Maeva informa del amenorgamientu del númberu d’araos na Ría d’Avilés

Según informen dende’l Grupu d’Ornitoloxía Maeva, la población d’araos de la Ría d’Avilés amenorgo hasta la metá, “cuando otros años incrementábase la población cola seronda hasta l’iviernu pa volver baxar en primavera y branu”, señalen. Maeva tenía censaos 120 araos a mediaos de payares, y en venti díes pasóse a 60.

Los fechos, asocedíos na segunda quincena de payares, entamen cola orde de matar araos empobinada pola Conseyería de Mediu Ambiente. Sicasí, según señalen dende Maeva, nengún aráu foi abatíu llegalmente na fastera d’Avilés.

Los ornitólogos censaron tamién los araos del banzáu de La Granda (Gozón), onde duermen la mayoría d’aves de la fastera. El día 30 d’avientu censaron 110 aves, cuando en payares dormíen ellí 130 araos y, anguaño, tendría qu’haber a lo menos el doble. Contradiciendo les teoríes de los pescadores qu’afiten que cada día hai más.
 
Pa Maeva, la coincidencia del amenorgamientu de la población d’aves y la orde de caza, indiquen la “mui posible” caza furtiva nel banzáu de La Granda, pero, según señalen, los pocos axentes de la Guardería de la Conseyería de Mediu Ambiente y del Seprona nun puen controlar once conceyos.