Denuncien l'apaicion d'aves muertes na Ría de Villaviciosa

Dende’l Grupu d’Ornitoloxía Mavea informen de l'apaición de seis aves muertes na Reserva Natural Parcial de la Ría de Villaviciosa. Los fechos ocurrieron el pasáu día 29 y el Grupu pidió-y a la Conseyería de Mediu Ambiente una investigación, con sanciones exemplarizantes, “yá que nun pue permitise esti desafíu a l'alministración”, señalen.

Según los ornitólogos, llegóse a esa situación pola falta de vixilancia medioambiental, por mor del poco personal, tanto de la Guardería del Principáu como del Seprona. Asina, camienten que la muerte de les aves ye causa de los problemes de xestión del cotu de caza de Villaviciosa, y non d’un posible furtismu na zona.
 
Ente les especies muertes tán una urraca, un mirlu, un estornín pintu, dos garcíes y una garza real, les últimes cinco protexíes.