Los padres gallegos escoyerán les materies que se darán en gallegu, castellán ya inglés

El presidente de la Xunta de Galicia, Alberto Núñez Feijóo, xunto’l Conseyeru d’Educación, Jesús Vázquez, fixo públicu ayeri’l nuevu borrador del decretu de llingües pal enseñu non universitariu. De llegar a aprobase, nel país vecín habrá una educación en gallegu, castellán ya inglés a partes iguales. Amás, los padres participarán na eleición del idioma pa cada materia.

Nel momentu de formalizar la matricula, los padres decidirán el modelu llingüísticu del centru escolar. Mientres que na educación infantil va consultase añalmente, nel restu de niveles la eleición tendrá llugar cada cuatro años. Nel casu de Primaria, Matemátiques y Sociales nun podrán ser impartíes nel mesmu idioma, una será en gallegu y otra en castellán.
 
Cuando nun haya profesoráu abondo pa impartir un terciu de materies n’inglés, los padres escoyeran les materies d’esa parte proporcionalmente nos idiomes oficiales. Na FP los centros garantizarán la igualdá de competencies nes dos llingües oficiales, según afita’l decretu.

Feijóo esclarió que nes hores vinientes a la presentación del testu diba unviar el borrador a les fuercies polítiques representaes nel Parlamentu, a la Real Academia Galega y al Conceyu de la Cultura Gallega, instituciones hasta’l momentu crítiques cola política llingüística popular, p’asina algamar “un decretu de toos”, en pallabres de presidente gallegu.
 
Col decretu anterior les escueles impartíen les asignatures nel idioma mayoritariu del escolín, siendo’l profesoráu’l qu’afitaba la llingua más usada ente los alumnos al traviés d’encuestes sociollingüístiques. Mientres, nos graos superiores establecíase un mínimu del 50% de materies en gallegu. Esi testu fora aprobáu pol bipartitu PSOE-BNG en 2007 y nél participó’l PP hasta’l momentu de la so aprobación