Dos hores y media más cada día d’información, l’entamu de la programación a partir de les 6.45 hores, l’aumentu de la emisión de “Mediodía entero” y la incorporación sele de seis nuevos programes son les novedaes de la radio pública pa 2010. Ente elles, l’estrenu d’un microespaciu informativu n’asturianu que va emitise tres veces al día.

A partir del ún de xineru RPA dirá incorporando los programes, algamando les 19 hores en direuto de llunes a vienres. A les 6.45 emitiráse la primer edición de “Asturias Hoy”, que tendrá una tercer edición ente les 23.00 y les 00.00 hores. Los boletines horarios emitiránse ente les diez de la mañana y les diez de la nueche. Tres d’ellos tendrán al lo caberu un bloque n’asturianu, “Batura”, presentáu por Vanessa Gutiérrez, presentadora tamién del magazín cultural de la TPA “Pieces”.

A les 00.00 hores llegarán tres nuevos espacios; “El Almacén”, dedicáu a la música actual y presentáu por Javier Blanco, “La pantalla mecánica”, programa cinematográficu de Pablo de María, mientres que Pachi Poncela presentará l’espaciu de música clásica “Ganas de música”.
 
Los fines de selmana la RPA ente les 10.05 y les 14.00 incorporará nuevos conteníos col estrenu d’un magazín presentáu por Sonia Avellaneda, conductora en delles ocasiones de la Xunta Estraordinariu de l’ALLA. Mientres que depués llegara “Laboreos”, onde María José Iglesias falará sobre les actividaes del campu y del mar. Queda por saber que se va facer colos programes n’asturianu qu’ocupaben esta franxa horaria como “Rockmería”, “Nomes d’Asturies”, “Paraisu Natural”, “Llugar pal Placer”, “Acuto” y “Revoltixu nes ondes”.
 
La RPA y l’asturianu
 
La Radio del Principáu d'Asturies entamó les sos emisiones en pruebes la mañana del ocho de setiembre de 2006, coincidiendo col Día d'Asturies. La radio pública entamó a sonar a les ocho de la mañana col tema musical "Xirandiyes" una adaptación del grupu "Felpeyu" de tres dances asturianes cola que se facía homenaxe a los desapaecíos Carlos Redondo y Igor Medio.
 
La primer emisión de la RPA tapeció a la de Radio Sele, yá que mientres la emisora n’asturianu emitía dende'l 106.5 de la FM con 50 watios de potencia, l'autonómica facíalo dende'l so repetidor principal del Gamoniteiru nel 106.4 con 120.000 watios. Radio Sele tuvo que camudar asina’l so dial pal 106.1 de la FM.
 
Un mes depués, el nueve d’ochobre de 2006, el cantautor Carlos Rubiera presentaba’l primer programa que ponía nes ondes la RPA. A les tres de la tarde, con repetición a les diez de la nueche, entamaba “Abriendo camín”, un programa musical yá desapaecíu onde se percorría la historia de la música asturiana dende’l Surdimientu.
 
Cinco foron los programes musicales d’una hora que s’estrenaron esa selmana, de los que cuatro foron n’asturianu, faciendo pensar a munchos que la llingua diba tener una presencia perimportante na RPA. Sicasí, programes como “Abriendo Camín”, “Canta l’uxu”, presentáu por Xosé Ámbas y precursor de “Camín de Cantares”, o l’ecolóxicu “El mirador d’Urdiales” foron desapaeciendo de la emisión col entamu de la programación en direuto en castellán, emisión que se foi enanchando mientres la programación enllatada n’asturianu diba amenorgando.