Les FARC denuncien un supuestu plan de desestabilización de Colombia contra'l Gobiernu d'Ecuador

|

El frente 48 de les Fuerces Armaes Revolucionaries de Colombia (FARC) denucnió l'entamu d'un supuestu plan de desestabilización per parte del Gobiernu d'Álvaro uribe contra'l mandatariu ecuatorianu, Rafael Correa, que desarrollaríen grupos parlamilitares na frontera común.

Esta denuncia realizóla'l grupu armáu nun comunicáu espardíu esti llunes na web de l'Agencia de Noticias Nueva Colombia, (Anncol). Esti frente yera'l responsable de la seguridá del 'ex' númeru dos de les FARC, Raúl Reyes, muertu en marzu del 2008, nun bombardéu del Exércitu colombianu a un campamentu asitiáu nel norte d'Ecuador.

Los guerrilleros aseguraron que los militares colombianos na frontera común comentaron "en tonu arrogante, despectivu y burllón" que "en casu d'un conflictu armáu con Ecuador", tornarán en "ropa de trabayu" a los "indios del Exércitu ecuatorianu".
  
A lo último, les FARC pidieron a los habitantes de la frontera colombo-ecuatoriana "confraternizar muncho más y crear un infranqueable muru humanu" pa evitar "la penetración dende Colombia a Ecuador d'elementos paramilitares con fines desestabilizadores obedeciendo a los planes desintegracionistes llatinoamericanos del Imperiu gringu, al traviés del Caín d'América, Álvaro Uribe", en referencia al presidente colombianu.
  
Quito y Bogotá caltienen rotes les sos rellaciones dempués de que Correa refugare la intervención de los militares colombianos nel so territoriu pa bombardiar el campamentu de les FARC onde s'alcontraba Raúl Reyes.
  
La situación empeoró cuando Uribe anunció un acuerdu con Washington que permitirá'l despliegue d'unos 1.400 soldaos y contratistes estaounidense en siete bases militares colombianes, lo que foi duramente criticáu por otros gobiernos de la rexón.
 

Contador Estadistiques