Suatea considera que l'aprobación de la 'Llei d'Evaluación' ye la consagración de "una descarada discriminación"

|

El Sindicatu Unitariu y Autónomu de Trabayadores de la Enseñanza d'Asturies (Suatea) considera que l'aprobación de la 'Llei d'Evaluación y los sos incentivos', que tuvo llugar güei na Xunta Xeneral d'Asturies, ye la consagración de "una discriminación descarada" nos salarios del senu de la enseñanza pública.

Nuna nota prensa, el sindicatu criticó que la política educativa del Gobiernu asturianu tea instalada dende hai años nel "despropósitu continuáu", cola acabación nuna llei que "persigue salir al pasu a les sentencies xudiciales qu'invaliden tol procesu, incluyíos los  discriminatorios pagos a cuenta que reciben aleatoriamente dalgunos docentes por facer el mesmu llabor".
 
Nel testu responsabilicen de la so aprobación a los diputaos del partíu mayoritariu nel gobiernu y a los sos collaboradores y "cómplices nesti atentáu contra la enseñanza pública", los diputaos d'IU-BA-Verdes.
  
Suatea llamenta qu'IU apoye lo que consideren una gran chapuza y renuncie a "principios éticos elementales" col únicu oxetivu de "apegase al poder" y aplaude la decisión de García Valledor, de renunciar al so cargu de diputáu porque "lu honra como persona y como políticu".
  
Dende Suatea, aseguren que tres años de llucha nun van renunciar al so propósitu y anuncien que caltendrán "tolos frentes abiertos", puesto que la llei aprobada güei pol Parlamentu asturianu "nun pasó pol Conseyu Escolar d'Asturies, nun tien el refrendu de la mesa sectorial d'educación y refugóla esplícitamente la Xunta de Personal docente non universitariu".
 

Contador Estadistiques