La Coordinadora Ecoloxista pide que los parques eólicos del occidente se sometan a evaluación d'impactu estructural

La Coordinadora Ecoloxista d'Asturies presentó propuestes nel trámite de suxerencies del Parque Eólicu de Pico Lombreiros, cola referencia PE-125 en Grandas de Salime, con siete mlinos de 2 Mw, de 80 metros d'altor y 80 metros de rotor. Ente les sos propuestes, pide que'l conxuntu de 88 instalaciones d'esti tipu previstes pal occidente asturianu, ente les que s'alcuentra la referida, se someta a la Evaluación d'Impactu Estructural pol so "efectu acumulativu" sobre'l paisaxe.

"Hai que recordar que nel conceyu de Grandas de Salime, onde yá ta funcionando'l del Acebo y Sierra la Cuesta con 27 y 12 molinos, hai otros dos en trámite, amás d'esti de Pico Lombreiros", esplicó la Coordinadora al traviés d'una nota prensa. Amás, recordó que "esti parque eólicu ye ún de los 88 previstos nel occidente asturianu, colo que l'impactu de toos ellos tien un efectu acumulativu, al qu'hai que sumar los impactos de les llinies d'evacuación y les subestaciones eléctriques, polo qu'entendemos qu'esti conxuntu precisa sometese a la Evaluación d'Impactu Estuctural qu'establez el 'Decretu Llexislativu 1/2004 del Gobiernu asturianu".

En concreto, la estructura de Pico Lombreiros recuerda que "afectará a abondos núcleos de población por proximidá; Trabada, Llandepereira, Mazo de Riodecabalos, polo que resulta evidente que tou esti conxuntu de parques debería sometese a una evaluación completa d'acordies a la Llei 9/2006, de 28 d'abril, sobre evaluación de los efectos de determinaos planes y programes nel mediu ambiente".
  
Los parques eólicos suponen, según la Coordinadora, "una perda de naturalidá, sin olvidar la probabilidá de choque de les aves, la modificación de la etoloxía pa les especies, polo que va afectar de manera significativa a les especies identificaes na zona, que son 25 mamíferos, 80 aves, 12 anfibios y diez reptiles".
  
Ente los mamíferos, destacó'l "osu, que ye una especie en peligru d'estinción d'acordies al Catálogu Rexonal d'Especies Amenazaes y polo que'l parque incumpliría'l Decretu 12/1991 Plan de Recuperación del Osu Pardu n'Asturies".
  
Tamién hai que tener en cuenta l'impactu que va suponer nos hábitat presentes incluyíos nel Anexu I de la Directiva Hábitat 92/43/CEE: berezales húmedos, berezales secos, berezales oró mediterráneos, praos probes de siega, roqueos silíceos con vexetación pionera, viesca de castanea sativa, viesques aluviales d'alnus glutinales y fraxinus excelsior.
  
Señaló tamién que la instalación "afectará paisaxísticamente a la zona que ta cerca del Llugar d'Interés Comunitariu de la Cuenca del Agueria". Calcó nel "impactu paisaxísticu que tienen estes instalaciones de torres de más de 80 metros d'altor, con pales de más de 45 metros de llargu". "Los aeroxeneradores pol so tamañu y pola so colocación nos cumales de los montes tienen un gran impactu visual y paisaxísticu, que los fai visibles dende munchos kilómetros de distancia y impacten sobre too en paisaxes naturales como son estos valles del occidente asturianu", recalcó.
  
A lo último, recordó que "Asturies ye una rexón escedentaria na producción eléctrica, a pesar de que tenemos el mayor consumu eléctricu per cápita por habitante; estos parques previstos toos ellos pal occidente, súmensen a les nueve térmiques de gas previstes y a les térmiques que yá tenemos en funcionamientu, lo que mos va facer más escedentarios contra los criterios de llóxica enerxética".