La Coordinadora Ecoloxista d’Asturies concede la Buyada Purpurina al Gobiernu d’Asturies

La Coordinadora Ecoloxista d’Asturies va entregar güei la Buyada Purpurina al Gobiernu d’Asturies por “dir a la contra de cualesquier propuesta de meyora ambiental y democrática que se proponga”.  Dende la Coordinadora señalen “l’engañu continuu que realiza’l Principáu y la presión contra los que nos oponemos a proyeutos que n’otros llares nun pasaríen nengún filtru y equí son almitíos”.

El Gobiernu asturianu recibe’l galardón pola so estratexa enerxética, na que citen el Plan de Gas que traerá regasificadora, centrales de ciclu combináu y llinies d’evacuación), tamién pola “obsesión” por formigonar la costa, por defender la “peligrosa” incineradora, por permitir abrir mines a cielu abiertu o “por permitir que sigamos siendo la rexón más contaminada d’España”, ente otros.
 
Los ecoloxistes esperen qu’asina’l Gobiernu asturianu tenga más sensibilidá cola naturaleza asturiana, “anque visto lo visto somos poco optimistes”. La Coordinadora diz qu’espera que los asturianos obliguen a un cambiu de xestión necesaria.
 
La Buyada purpurina ye un galardón que vien entregándose dende va 17 años pa reconocer la llabor d’empreses, instituciones y alministraciones que según el xuráu más se destacaron pola so llabor contra la naturaleza y el mediu ambiente.
 
Este añu les candidatures propuestes foron; Victorino Alonso, Secretariu de la FSA, el gobiernu de Principáu, el  Puertu d’Avilés, Conseyeru Mediu Ambiente, la Conseyera de Cultura, al Direutor de Mines, l’Alcaldesa de Xixón, la Demarcación de Costes, l’Alcalde de Cuideiru y Ence.