Corbacho diz qu'hasta marzu va ser difícil ver "formigoneres na cai y xente trabayando"

|

El ministru de Trabayu y Inmigración, Celestino Corbacho, aseguró güei que "hasta'l mes de marzu va ser difícil ver les formigoneres na cai y la xente trabayando", y que nun va ser hasta'l segundu semestre del 2009 cuando la economía nacional entame a reactivase, por mor de les midíes articulaes pol Executivu pa facer frente a la crisis.

A entrugues de los medios demientres la rueda prensa qu'ofreció xunto col presidente rexonal de Castiella La Mancha, José María Barreda, Corbacho defendió qu'a pesar de les dificultaes pa facer un diagnósticu, "les midíes van tadar tiempu en tener un espeyu real".

Asina, el ministru atribuyó esi retrasu al funcionamientu del Estáu de Derechu: a pesar de la velocidá y l'impautu de la midida adoptada pol Gobiernu son necesarios 40 díes pa que seya efeutiva, "y eso a pesar de que se tramitó con carácter d'urxencia", añadió.

Dicho eso, Celestino Corbacho reconoció que'l mercáu llaboral, por mor d'esi retrasu, va deteriorase "muncho" de tal manera que'l paru va siguir n'aumentu col primer trimestre del 2009, y que nun va ser hasta'l segundu semestre cuando la economía española entame a recuperase.

El ministru que calcó en que ye mui difícil qu'España nun sufra les consecuencies d'esta crisis que tien carácter universial, faló de la situación qu'atraviesa'l sector automovilísticu. El país cuenta con fábriques "magnífiques", con prestixu en teunoloxía, diseñu y fabricación, ye reconocíu nel esterior, onde coloca'l 80% de la producción.

"Diches fábriques tán faciendo axustes, non porque dexaren de ser punteres, sinón porque hubo una contraición de la economía que repercutió nes ventes y nel mercáu, y neso nun somos diferentes a Europa", esplicó.

De siguío, el ministru criticó'l "usu perversu, políticamente falando" que se ta faciendo d'esta situación, diciendo que n'España hai más paru que nel restu d'Europa. "Pero toos somos responsables d'esi modelu económicu que n'otru momentu xeneró crecimientu y riqueza, basándose na construcción", añadió.

L'aprobación económica del sector de la construcción al PIB, esplicó'l ministru, foi mui grande, pues yera la mesma que nes economíes de Francia y Alemaña xuntes, de tal manera que se cosntruyíen 700.000 viviendes al añu, que daben emplegu a 1,5 millones de persones.

Contador Estadistiques