La Fundación Osu Asturies destaca que'l 2010 pue ser un añu "mui importante" si se confirma que la osa Tola ta preñada

La Fundación Osu Asturies afirmó güei que demientres 2010 siguirá trabayando nel Proyectu de Manexu Reproductivu d'Osos Pardos en Cautividá, col apoyu y asesoramientu científico-tecnolóxicu del Grupu d'Investigación en técniques de reproducción asistida de la Universidá de Lleón y cola collaboración de la Conseyería de Mediu Ambiente. Asina destacó qu'esti añu pue ser mui importante pa corroborar l'éxitu d'esti programa si se confirmare que la osa Tola ta preñada.

La fundación esplicó que la osa ta ivernando dende últimos de payares, si bien nun pue confirmase que s'alcuentre n'estáu de xestación. Ésti foi ún de los asuntos trataos demientres el conceyu del Patronatu de la Fundación, na que s'aprobó un presupuestu cercanu a los 400.000 euros pal próximu exerciciu.
  
Según informó l'Executivu rexonal al traviés d'un comunicáu, con estos fondos, la entidá collaboradora del Principáu d'Asturies continuará desarrollando actividaes d'educación ambiental y participando n'estudios o acontecimientos rellacionaos col mediu ambiente o la biodiversidá.
  
Asina, ta previsto desarrollar otra vuelta'l Programa d'Educación Ambiental Valles del Osu, amás d'entamar esti añu un nuevu proyectu pilotu d'educación ambiental. Trátase d'una iniciativa que se desarrollará nel mes de mayu nel conceyu de Somiedu, y que va destinada a alumnos d'enseñanza secundaria.
  
Per otru llau, la entidá collaborará un añu más col 'Programa de Mediu Ambiente na Escuela', faciéndose cargu de los guíes que realicen distintos percorríos per Asturies.
  
P'acabar la Fundación espunxo al so Patronatu un proyectu d'investigación que prevé desarrollar col apoyu de la Fundación Biodiversidá y que contará con un presupuestu de 49.500 euros. Asina un añu más, la fundación participará en delles Feries y Esposiciones rellacioanes cola naturaleza.