Agradeciendo a l’Axencia Asturiana de Cooperación (AAC) poder falar n’asturianu, “un deséu que siempre tuvi dende que recibí la solidaridá d’Asturies”, entamó l’activista y escritor colombianu Héctor Mondragón la videoconferencia dende Brasil col xixonés local de l’asociación Solpedaz Pachakuti, onde l’AAC presentaba la traducción asturiana de “La estratexa del imperiu. Too pal capital tresnacional”.

Na presentación de la traducción de Xosé Firmu García Cosío participó, amás del propiu autor del llibru por videoconferencia, Rafael Palacios, de l’AAC, que ye quien edita la obra, y el sindicalista colombianu Javier Orozco. Palacios dixo que teníen la intención d’espublizar la obra nuna edición billingüe asturianu-castellán, pero a la fin namás tuvieron los drechos pa facelu na nuesa llingua.
 
Rafa Palacios, que dixo que n’Asturies como en munchos llugares del mundu tamién había vulneración de drechos, en rellación a los asturfalantes, esclarió que l’oxetivu del llibru yera esfrutar de la capacidá de reflexón d’Héctor. Un llibru que fala de la necesidá de construyir una alternativa pa camudar el mundu, una estratexa común como la que tien EEXX, según dixo Orozco y el propiu Palacios.
 
Al traviés de la videoconferencia, Héctor Mondragón faló de cómo los imperios imponen les sos regles, “una dominación que vien al traviés de la política, lo militar, la economía y los medios de comunicación”. Dixo que la economía capitalista anguaño ye un Imperiu, “yá que la globalización y l’Imperiu van acullá de les fronteres étniques y culturales, yá qu’ésti namás tien una sé física, los EEXX”.
 
Mondragón señaló que la globalización ye un gran Imperiu, yá que “les tresnacionales tán lligaes a grandes grupos de capital con rellaciones col gobiernu estaoxunidense”. Por mor d’ello, dixo que les tresnacionales controlaben el gobiernu de los EEXX, tamién los gobiernos llatinoamericanos, “yá que controlen es telefóniques y los recursos enerxéticos d’América Llatina y quien controla la enerxía controla la economía”.

Sentenció que taba produciéndose una romanización del mundu polos políticos; “Enantes de ciudadanos somos humanos, agora tamos volviendo a la época romana, na qu’había ciudadanos que teníen drechos y llueu taben el restu”, sentenció.
 
Héctor Mondragón dixo que quixera falar asturianu, “pero nun lu fixe por respetu y vergüenza”. Sicasí, al traviés de la web-cam, amosó’l “Manual de llingua asturiana” de Milio Rodríguez del Cueto que mercó en Xixón y col que se tuvo preparando.