Marcador alloriante n'El Molinón

Otra derrota del Sporting nel Molinón Otra vuelta volvieron a marchar de casa los tres puntos y ye que los xixoneses tan amosando muncha mayor eficacia nos estadios de fuera que nos partíos de casa.

Un Atléticu de Madrid con Agüero, Forlán y poco más valió pa derrotar a un Sporting mui fallón en defensa nun resultáu mui desaxeráu pa los méritos que fixeron los visitantes. Sicasí, el Sporting continúa na zona tranquila de la tabla nel puestu doce con 18 puntos. El partíu nun entamó mal pa los asturianos que nel primer corner batieron al porteru visitante gracies a un cabezazu llibre de marca de Bilic. Sicasí, la respuesta atlética foi inmediata gracies a un chilena d'Agüero tres una riestra de despistes defensivos qu'a la fin diben marcar el partíu. El propiu Agüero marcaría el segundu rematando a placer depués de que Cuellar nun fuera quien a blocar el balón.

La segunda parte entamó con otru gol visitante tres un fallu imperdonable d'Iván Hernández, que col balon ganáu dexóse robar por Forlán qu'acabó batiendo a Cuellar. Sicasi les esperances volvieron pa la parroquia xixonesa gracies a un trallazu de Barral dende fuera l'area que metió pela escuadra. Poco duró la esperanza porque nos minutos finales los madrileños marcaríen otros dos goles gracies a la imprecisión defensiva de los asturianos, que cometieron una serie d'errores que costaron la goleada. Un resultáu enforma abultáu pa los méritos de los dos equipos.

Ficha técnica Sporting: Cuellar, Sastre, Gerard (Barral m 58), Iván Hernández, Canella, Matabuena, Camacho, Pedro (Luis Morán m 71), Carmelo (Kike Mateo m 82), Diego Castro y Bilic

Atlético: Leo Franco; Seitaridis, Heitinga, Ujfalusi, Pernía; Assunçao,Maniche (Raúl García m 67), Maxi, Simao; Forlán (Ever m 83) y Kun Agüero (Sinama m 77) Goles: 1-0 Bilic (m 3), 1-1 Agüero (m 5), 1-2 Agüero (m 40), 1-3 Forlán (m 55), 2-3 Barral (m 61), 2-4 Maxi Rodríguez (m 72), 2-5 Forlán (m 81)

Árbitru: Turienzo Álvarez. Sacó-yos tarxetes marielles a Matabuena (m 40), Simao (m 43), Seitaridis (m 52), Assunçao (m 57), Iván Hernández (m 62), Ujfalusi (m 73).