El Conceyu d’Avilés recupera un orixinal del so Fueru

El Conceyu d’Avilés daba ayeri anuncia de que taben acabantes de recuperar un segundu orixinal del Fueru d’Avilés, el primer testu alministrativu n’asturianu. El documentu, del que yá se tien un exemplar del añu 1155, taba perdíu dende 1808 y comprólu’l Conceyu por 72.000 euros a los actuales propietarios. El Conceyal de Cultura avilesín, Román Álvarez, dixo que’l testu “contribuirá al conocimientu de la nuesa historia y la d’Asturies”.

El documentu perdiérase na invasión napoleónica d’Asturies, cuando’l xerente de l’Audiencia Provincial d’Uviéu, Pascual Quílez, evacuó’l testu xunto otros cartafueyos pa evitar la so perdida. Al finar la guerra contra los franceses Quílez asitióse en Murcia, ellí foi onde quedo’l peramín y la so familia, a la que’l Conceyu compró-y el documentu por 72.000 euros, de los que 22.000 foron con dineru públicu y el restu pagóse con donaciones de particulares.
 
El testu recuperáu agora tien pequeñes diferencies col que yá se tenía. El “nuevu” tien dos párrafos más, los mesmos que se recueyen nel Fueru d’Uviéu, y tola superficie del pergamín ta completa, amás de que nun coincide la lletra del amanuense, polo que se supón que los encargaos de les dos copies foron dos persones diferentes.
 
El fueru, amosáu a los medios pol Conceyal de Cultura y l’Alcaldesa, Pilar Varela,  ye un pergamín de pelleyu, formáu por dos pieces de 0,45 metros d’anchor y que xuntes algamen 1,25 metros d’altor. Según esclarió’l Conceyal de Cultura, Román Álvarez, va ser necesariu sometelu a restauración, yá que presenta marques de dobleces. El documentu presentaráse a lo llargo de 2010, nun actu que podría dir acompañáu d’un congresu sobre’l testu.