L'Anuariu de la Música alvierte que cola crisis los primeros en cayer del cartel fueron los grupos asturianos

El director del Anariu de la Música Asturiana, Xune Elipe, considera que cola crisis "los primeros en cayer del cartel" de les fiestes y eventos públicos son los grupos de música asturianos, y criticó por ello a les instittuciones y a organizadores de eventos nesti sen.

Fízolo güei, na rueda de prensa de presentación de la décima edición del Anuariu, qu'esti añu analiza la repercusión de la crisis económica del panorama musical del país, especialmente no que cinca a la celebración de conciertos que, según dixo, descendió enforma.

Asina lo comenta nel so editorial y asina espresen la so preocupación dellos músicos asturianos nel reportaxe 'La crisis sube al escenariu', del periodista Francisco Álvarez. Según explicó Xune, la venta de discos va directamente rellacionada coles actuaciones en directo, y esti añu'l númberu d'actuaciones descendió considerablemente porque les iniciatives privaes "reduxeron los eventos públicos onde la música asturiana ta presente" y porque les Administraciones "recorten primero presupuestos con grupos llocales". Too ello débese, según Elipe, a la "falsa creencia" de que los grupos de fuera tienen más repercusión.
  
Sicasí, recordó qu'esti añu aquellos actos nos que tuvo presencia la música asturiana tuvo muncha respuesta, como los festivales Beltaine d'Avilés, 5.40 de Xixón, Llanes al Cubo o los Alcuentros Tradicionales de Trebolgu, celebraos n'Uviéu un llunes llaborable.
 
MUYERES NA MÚSICA
  
Otru de los reportaxes estrella del númberu que destacó Elipe foi'l dedicáu al papel de la muyer na música asturiana, firmáu por Beatriz R. Viado, qu'entrevistó a delles intérpretes sobre la escasa presencia de fémines na canción asturiana.
  
Tamién hai reportaxes y cróniques dedicaos al Festival Liet 2009, y l'actuación nél d'Alfredo González, al grupu Xera, asina como entrevistes a Toli Morilla, a Manuel Fernández de la Cera, y el cuestionariu colectivu a dellos vocalistes sobre'l rock n'asturianu, formuláu pol periodista Xicu Ariza.
  
Amás informa sobre les producciones musicales d'esti añu n'Asturies, que Xune Elipe cifró en 42, una cantidá asemeyada a la d'otros años pese a la repercusión de la crisis económica.
  
Esta décima edición del anuariu distribuyiráse mañana de baldre col diariu Les Noticies. Amás, repartiránse hasta un total de 4.000 exemplares ente instituciones, colectivos, empreses y públicu en xeneral.