Esta Navidá agasaya n'asturianu

Mañana pela nueche L’Esteru baxa de les viesques de los montes más orientales d’Asturies, onde lleva tol añu tronzando lleña, y vien trayer regalos a tolos neños del país. Si tovía nun lo fixisti, ainda tas a tiempu d’escribi-y la carta. Dende Asturies.com y la llibrería Paraxuga recomendávosmos que pidáis regalos n’asturianu y pa ello vamos aconseyavos dos llibros y dos discos “made in Asturies”.

El primer llibru que nos recomienda Yolanda Gil dende Paraxuga ye “El Cancioneru l´Andecha. La muñeira n´Asturies”. Una obra que tien dos partes; una primera na que s’estudia’l baille (oríxenes, distribución xeográfica y estructures) y una segunda na que se trescriben tolos rexistros sonoros de les grabaciones de campu que tenía l’Andecha. Munches son les persones que participaron na ellaboración de la obra: Maribel Álvarez Álvarez (Teoría sobre la estructura y la zonificación de la muñeira); Chuso Fernández Álvarez (Toponimia), Matilde Fernández Álvarez y Octavio Trapiella Fernández (Elaboración de testos n’asturianu); Diego Pangua y Pedro Pangua (Trescripciones musicales); Consuelo Ríu García (Diseñu de portada) y José Ángel Llaneza (Infografía y maquetación). Toos ellos coordinaos por Maribel Álvarez y Fernando de la Puente.
 
Y dende Paraxuga  siguen recomendándonos llibros pa conocenos meyor a nós mesmos. Asina, la segunda y última recomendación lliteraria ye'l “Paxellu Asturianu o Traxe´l País”. L'autor ye Gausón Fernande Gutierre y ye un trabayu d'investigación sobre la indumentaria del pueblu asturianu nos caberos sieglos con guapes semeyes. Vien nuna edición en billingüe asturianu-castellanu. El llibru ta dixebráu en delles estayes; El Princés d´Asturies D. Alfonso y el paxellu asturianu, El vistíu, una seña d´identidá, Otres formes de vistir de los asturianos :Los sieglos XVI y XVII, El fatu la muyer; Montera, pañuelu, les lligues, la saya etc, El fatu l´Home: Camisu, Montera, Xugón, chamarra etc, El traxe´l país en dellos conceyos y pa finar Vocabulariu de términos xareyaos col vistir.
 
La primer recomendación musical ye “El sonar de les semeyes” de la cantante y percusionista de Ḷḷena Mapi Quintana. Onde la cantante, asitiada dende va años n´Amsterdam, ufre once temes con una reinterpretación jazzística, dalgunos tradicionales y otros composiciones propies. Andechen con ella; Elena García (Flauta), Thijs Cuppen (Pian y melódica), Nicolás Rodríguez (Baxu), Marcos Baggiani (Batería), Yaniv Nachum (Saxos, tenor y sopranu) y Stijn Van Beek (Gaita irlandesa y Whistle baxu).
 
Pa finar recomiéndanos el discu "Tomás de la Güeria, Urbíes (1923-2008)”. Un doble Cd cola importancia de tener un repertoriu completu d’un instrumentu de la tradición musical asturiana del que nun hai nada espublizáu (la curdión de botonera). Pa Yolanda Gil el valir d´esti discu ye poder amosar al músicu, la so técnica, los sos comentarios, los sos cantares y la so imaxe nun videu que ta nel Cd 2.Ye un documentu irrepetible pa la música tradicional asturiana. Tolos temes d´esti doble Cd son tradicionales.