Primer pasu pa la oficialidá del aranés, que podrá usase en toa Cataluña

Cataluña dio güei un primer pasu pa la oficiliadá del aranés, dempués de que'l Conseyu Executivu de la Generalitat aprobare güei l'anteproyectu de Llei del Aranés, que contemplará qu'esta llingua puea utilizase ante toles alministraciones en tol territoriu catalán.

El vicepresidente, Josep Lluis Carod Rovira, esplicó güei en rueda prensa tres el Conseyu que con esti testu, qu'agora entama la so tramitación parlamentaria, Cataluña será'l "únicu territoriu de tola península ibérica" onde habrá trés llingües oficiales: el catalán, el castellán y l'occitanu na so variante dialectal aranesa.

Cola oficialidá del aranés, cualquier falante d'esta llingua podrá usala tamién na xusticia, y consagraráse l'occitanu como "llingua preferente" n'Arán, nel so sistema educativu y na toponimia oficial.
  
L'anteproyectu de llei regula l'usu oficial del occitanu y los derechos llingüísticos de los sos usuarios, y desarrolla lo que diz l'Estatutu sobre esti tema. Precisamente, la llei catalana declara nel so artículu 3.2 la oficialidá del occitanu y atribúi a la Generalitat y al Conselh Genereu d'Aran competencies sobre la normalización llilngüística del aranés.
  
El testu amás quier fomentar l'usu social del aranés, y tamién el so espardimientu y la conocencia. Recueye que debe utilizase a nivel institucional, na toponimia oficial, na enseñanza, nos títulos y certificaos y tamién en radio y televisión.
  
Carod tamién destacó que, cuando entre en vixencia esta llei, les lleis qu'apruebe'l Parlamentu deberán publicase n'aranés y qu'esta versión tendrá carácter oficial.
  
Pal vicepresidente, cola aprobación d'esti testu, Cataluña asítiase nuna posición delantera en "atención a la diversidá llingüístcia y cultural", y amás, la primer vez, l'occitanu tendrá estatus de llingua oficial, dalgo que nun asocede nel restu de territorios nos que se fala.