L'afroamericanu Barack Obama, nuevu presidente de los Estaos Uníos

|

Barack Obama, el nuevu presidente electu d'Estaos Uníos, fizo historia esti 4 de payares al tornar nel primer afroamericanu en llegar a la Casa Blanca, un acontecimientu ensin precedentes. Con un mensaxe d'unidá y esperanza y la so promesa de cambiu como bandera, el senador pronunció'l so primer discursu ante cientos de miles de persones en Chicago, que se tresmitió en directu a lo llargo y ancho d'EE.UU.

"Si hai dalguién que tovía duda de que cualquier cosa ye posible n'EE.UU, si dalguién tovía piensa que nun se caltienen los suaños de los nuesos pas fundadores, si a estes altures dalquién cuestiona'l poder de la nuesa democracia, la respuesta la tien nesta nueche", entamó Obama. "América unvió un mensaxe al mundu, que somos y vamos ser siempre los Estaos Uníos d'América. Tardamos muncho en llegar, pero esta nueche'l cambiu llegó a EE.UU".

El futuru presidente pasó llista a munchos de los retos que-y esperen de magar agora, como les guerres n'Irak y Afganistán, la grave crisis económica qu'atraviesa'l país, la creación de puestos de trabayu y meyorar el sistema educativu. "Quédamos per delantre un camín llargu y difícil, pero como pueblu sé que lo vamos algamar", indicó Obama, al qu'en delles ocasiones interrumpió pola xente con glayíos de 'Yes, we can'.

Sicasí, alvirtió que nel camín va haber dificultaes, y que munchos nun van tar d'acuerdu coles decisiones que tome. "Pero siempre voi ser francu con vosotros, voi pidivos que vos suméis al esfuerzu de construyir esta nación", dixo'l candidatu. "Lo qu'entamó hai 21 mess güei faise realidá, apellemos a un nuevu espíritu de sacrificiu, onde mos esforcemos por cuidamos a nós mesmos y a los demás", añadió.

Los sos primeros agradecimientos fueron pa McCain, de'l que resaltó los sacrificios que fizo pol so país, y la gobernadora Sarah Palin, colos que dixo que deseaba ponese a trabayar nos próximos meses. Tamién mencionó al so compañeru de fórmula, el yá vicepresidenta electu, Joe Biden, y llueu dio pasu a los sos familiares.

Al "amor de la so vida", Michelle, ensin la que nun llegare onde llegó, a les sos fíes, y mui especialmente a la so güela, que morrió'l llunes ensin poder ver al so nietu presidente.

338 VOTOS ELECTORALES PA OBAMA FRENTE A LOS 160 DE McCAIN

El candidatu demócrata ya s'aseguró 338 votos electorales, con un 52 por cientu de los votos, frente a los 160 del so rival republicanu, John McCain, con cinco puntos menos, tres l'escrutiniu del 87 por cientu de los votos nel conxuntu del país, según los datos oficiales facilitaos pola CNN.

De la mesma manera, al falta del recuentu definitivu, los demócratas arrebataron a los republicanos al menos siete estaos nos qu'éstos ganare nel 2004: Virxinia (99 por cientu escrutáu), Iowa (99 por cientu), Nuevo México (98 por cientu), Colorado (80 por cientu), Nevada (68 por cientu), y dos estaos particularmente disputaos, Ohio (col 91 por cientu) y Florida (99 por cientu).

HOMENAXE A LOS NEGROS Y A LES MUYERES

Faciendo honor a los sos raigaños, Obama dedicó tamién una parte de la so intervención a homenaxar a toos aquéllos a lo llargo de la historia d'EE.UU refugaos pol color de la so piel, y a toles muyeres discriminaes pol so sexu, y pa ello destacó l'exemplu d'Alison Cooper, una muyer de 106 años qu'esti 4 de payares foi a votar n'Atlanta "pa contribuyir nel procesu de cambiu del país".

Obama, que per momentos recordó al reverendu Martin Luther King, tamién apelló a una cita de Abraham Lincoln: "nun somos enemigos, somos amigos", pa dici-yos a toos aquéllos que nun apostaron por él nin lu votaron nestes eleciones que tamién va ser el so presidente, polo qu'espera contar col so apoyu, col apoyu de tolos norteamericanos pa poder facer realidá'l cambiu históricu al que tanto apellaron demientres estos meses de batalla electoral.

Y acabó con un mensaxe a los "enemigos" d'EE.UU, del modelu que representa y de los sos ideales de democracia y llibertá. "A los que quieran destruyir el mundu, vamos vencevos, y a los que busquen la paz y la concordia, vamos tar al vuesu llau", indicó'l presidente electu, nunes pallabres que coinciden col so mensaxe demientres tola campaña y que faen augurar el fin de la era Bush y l'entamu d'una nueva etapa, d'una nueva forma d'entender el mundu.

Poco enantes de qu'Obama apaeciere nel Gran Park de Chicago, el senador McCain salió ante les cámares de televisión p'asumir la so derrota nes urnes y felicitar al presidente electu. "El pueblu americanu faló y faló claro. Acabo de llamar al senador Obama pa felicitalu dempués de tornar nel presidente electu d'EE.UU", afirmó McCain nun discursu ante los sos simpatizantes en Phoenix.

Contador Estadistiques