Mercedes Álvarez rescampla la importancia de la lliteratura n’asturianu y el so valir pa la normalización del idioma

Nun discursu pronunciáu dafechu en castellán, la Conseyera de Cultura y Turismu, Mercedes Álvarez, afaló a los cinco ganadores de los Premios Lliterarios y a tolos escritores na llingua del país que “tán poniendo la lliteratura asturiana nel presente y nel futuru, algamando reconocimientu dientro y fuera”. Pa la Conseyera una bona lliteratura ye “un pegoyu fundamental de la normalización social” que “llevanta un edificiu de respetu y llealtá al asturianu”.

Asina s’espresó Álvarez na gala d’entrega de los Premios Lliterarios n’asturianu. Celebrada na sede de la Conseyería de Cultura y onde se reconoció’l trabayu d’Ismael González Arias (“María Xosefa Canellada” de lliteratura infantil y xuvenil), Ruma Barrero ("Alfonso Iglesias" de cómic), Miguel Allende ("Xuan María Acebal" de poesía), Xulio Arbesú ("Máximo Fuertes Acevedo" d’ensayu) y Pablo Antón Marín Estrada (“Xosefa Xovellanos” de novela).
 
Mercedes Álvarez rescampló que nel nuesu país, con un millón d’habitantes, presentáronse ocho noveles al premiu de narrativa, lo que “val pa dase cuenta de la potencia, vitalidá ya impulsu de les nuestres lletres”. Unes lletres que según la Conseyera faen una Asturies “más culta, más informada y arguyosa de so”.
 
Del mesmu mou, faló de que yeren munchos los compromisos del Principáu col idioma, “como ye’l sofitu a la creación lliteraria al traviés de premios como ésti, ayudes a la creación, edición o promoción”. Señaló qu’en 2010 Política Llingüística tendrá un presupuestu austeru “pero abondo p’afianzar y estender les polítiques de sofitu a la creación”.
 
Ismael González Arias ganó’l “María Xosefa Canellada” de lliteratura infantil y xuvenil cola novela “Les puertes del cielu”, una obra que trata’l tema de la emigración asturiana a los EEXX a finales del sieglu XIX.
 
El “Alfonso Iglesias” de cómic, un premiu que según la Direutora Xeneral de Política Llingüística, Consuelo Vega, convocase por primer vez pa puxar por xéneru que nos últimos años ta teniendo un desendolcu importante, foi pa Ruma Barrero cola obra 'Manzajú'. L’autor aprovechó’l so discursu pa defender el cómic como lliteratura.
 
Miguel Allende recoyó’l "Xuan María Acebal" de poesía por “Pastoral en sol mayor (Endecha de la memoria)”. “Un poemariu que, con gran intensidá, riqueza léxica y dominiu métricu y rítmicu, fala con voz emocionada d’un mundu en vies de desapaición", según l'acta del xuráu. L’autor quixo dedicar el premiu a la memoria del so pá, “un pastor, como’l mio güelu y los sos antecesores”.
 
El “Máximo fuertes Acevedo” d'ensayu foi pa “El destín treshumanu”, de Xulio Arbesú por ser un ensayu “de gran guapura llingüística y lliteraria que trata'l tema orixinal dende una suxetividá abierta”. Un tema, que según l’autor, refierse “a too tipu d’aditivos que van camudar la naturaleza humana dientro décades”.
 
L’últimu en recibir el premiu, una escultura de Charo Cimas y 7.000 euros, foi Pablo Antón Marín Estrada, que recibió’l Xosefa Xovellanos pola obra “Mientres cai la nueche”. El xuráu reseñó la combinación acertada de rigor documental y bona construcción narrativa, non falta de matices poéticos d’un tema que s'avera a los acontecimientos históricos de la posguerra, centrando la so atención nes aventures de los fugaos que s'echaron al monte pa lluchar contra'l franquismu.
 
Un “felices fiestes pa toos y bon añu 2010”, les úniques pallabres pronunciaes n’asturianu pola Conseyera de Cultura, punxo puntu y final a la gala.