Los Gobiernos d'España y d'Asturies confirmen el nuevu modelu de financiación, qu'entrará en vixencia nel 2010

Los Gobiernos d'España y d'Asturies confirmaron ayeri llunes l'acuerdu que da lluz verde al nuevu modelu de financiación autonómica, qu'entamará a aplicase de magar el próximu añu. Asturies yá dio'l pasáu mes de xunetu, nel Conseyu de Política Fiscal y Financiera, el so apoyu al nuevu sistema, al recoyer les sos principales exixencies,según informó'l Gobiernu autonómicu nuna nota prensa.

La conseyera d'Alministraciones Públiques y Vocera del Gobiernu, Ana Rosa Migotya, y el d'Economía y Facienda, Jaime Rabanal, amás de la viceconseyera de Mediu Ambiente, Belén Fernández, y los voceros de los grupos parlamentarios na Xunta Xeneral, participaron xunto al secretariu d'Estáu de Política Territorial, Gaspar Zarrías Arévalo, nel conceyu de la Comisón Mista de Tresferencies, onde se confirmó'l nuevu modelu de financiación.

D'esta  manera zárrase la so aplicación de magar el 2010, tres aprobase'l pasáu mes e xunetu nel Conseyu de Política Fiscal y Financiera, sin nengún votu a la escontra y el xueves últimu poles Cortes Xenerales.
  
En función d'esti acuerdu, el Gobiernu d'Asturies acepta como propiu'l sistema de financiación conteníu na Llei Orgánica de Financiación de les Comunidaes Autónomes (Lofca). Por esta llei orgánica regúlase'l sistema de financiación de les Comunidaes Autónomes de réxime común y modifíquense determianes normes tributaries y los Fondos de Converxencia Autonómica.
  
El Conseyeru d'Economía y Faicenda sorrayó qu'esti nuevu modelu de financiación autonómica "ye pa los que confiamos nos asturianos y na economía asturiana, una oportunidá pal futuru d'Asturies".
  
Pela so parte, la conseyera d'Alministraciones Públiques insistió nel beneficiu d'esti acuerdu. "Ye la confirmación formal d'un nuevu modelu de financiación que beneficia a Asturies. El Gobiernu peleó siempre pa que s'incluyeren criterios como l'avieyamientu de la población y l'espardimientu, y  una vez asumíes xenerán beneficios".
  
Según esplicaron ambos conseyeros, Asturies siempre reconoció que la población yera un elementu esencial na discusión sobre la financiación autonómica y a la vez demandó que'l nuevu modelu debía recoyer los costes de la prestación de los servicios a los ciudadanos, al ser una comunidá autónoma condicionada pol avieyamientu de la población y el so espardimientu xeográficu.
  
Ana Rosa Migoya criticó la postura de los responsables políticos de les autonomíes gobernaes pol Partíu Popular que "guei sí firmaron el nuevu modelu de financiación a pesar de refugalu nel Conseyu de Política Fiscal y Financiera".