El PSOE niega que'l Gobiernu reconoza la "soberanía de Marruecos" sobre'l Saḥara

La secretaria d'organización del PSOE, Leire Pajín, negó esti llunes "dafechu" que'l Gobiernu reconociere "la sobernaía de Marruecos respeuto al Saḥara Occidental" nel comuicáu qu'emitió dempués de que'l país magrebí permitiere la torna a L'Aaiún de l'activista saḥaraui Aminatu Haidar y, tres alvertir que los socialistes nun aceptarán "lleiciones" del PP sobre esti asuntu, pidió al primer partíu de la oposición que dexe de "tentar de confundir" a los ciudadanos.

Na rueda prensa qu'ofreció na sede federal del partíu, tres el conceyu de la Executiva Federal, la dirixente socialista entrugáronla en dos ocasiones sobre l'últimu párrafu del citáu comunicáu nel que s'afirmaba que "mientres se resuelve'l conteníu, en conformidá cola posición de Naciones Uníes, España constata que la llei marroquí aplícase nel territoriu del Saḥara Occidental".

"De nenguna manera ye una reconocencia de la soberanía de Marruecos sobre'l Saḥara Occidental", sorrayó güei Pajín, qu'eslicó qu'esi documentu "forma parte de la negociación" qu'España caltuvo colos sos "aliaos" y que permitió la torna a casa de Haidar.
  
Nesti contestu, la dirixiente socialista esforzóse por dexar claro que la posición "activa y responsable" del PSOE y del Gobiernu sobre la ex colonia española nun cambió. "Foi, y será exactamente la mesma", calcó, insistiendo en qu'ambos trabayen pa buscar una "solución definitiva y xusta" a un problema que dura yá "munchu tiempu".
 
DERECHU D'AUTODETERMÍN
  
Pa evitar posibles dudes, calcó en qu'esa solución pasa "por supuesto" por reconocer el derechu d'autodetermín de los saharauis, tal y como establez Naciones Uníes. "El Gobiernu sigue comprometiéndose pa buscar tolos resortes diplomáticos y el diálogu permanente colos implicaos", añadió.
  
De magar ehí, Pajín refugó les crítiques que'l PP dedicó nos últimos díes a la xestión del Executivu sobre'l 'Casu Haidar' y fízolo tachando de "incoherente" que los 'populares', una vez más, pidan dimisiones cuando'l Gobiernu "resuelve los problemes". "Cuando ellos cometíen neglixencies como col Yak-42 o'l Prestige nun s'aplicaben el cuentu y nin siquier pensaben en pidir disculpes", quexóse.
  
Tamién se refirió a les "graves" acusaciones que "por inorancia o mala fe" realizó'l cabezaleru del PP, Mariano Rajoy, rellacionando la vuelta de Haidar a L'Aaiún con un acuerdu d'agricultura de la Unión Euroopea. Pajín, dempués d'acusalu de "mentir", recordó a Rajoy que la mayoría de les empreses del sector del tomate en Marruecos son españoles.