María Luz Pontón presenta'l so llibru “Una urraca blanca”

La escritora y collaboradora d’Asturies.com María Luz Pontón presenta esti vienres 19 nel Club Prensa Asturiana de La Nueva España , c/Calvo Sotelo, 7. Uviéu. a les 19 hores el so últimu llibru “Una urraca blanca”, con illustraciones de Mabel Piérola y editáu pola Editorial Bellaterra. Esti llibru editase en dos versiones: castellanu y catalán.
El cuentu básase nuna noticia real: el nacimientu d’una pega albina en China. ¿Cómo se sentirán el restu de les pegues ante un fechu tan estrañu? Les pegues adoren el so noble, elegante y sofisticáu color negru, el negru del poder. Nin na peor de les velees imaxinaben a una pálida pega de llavandería. Nun entienden cómo pudo pasar una llaceria asina. Los pás nun-yos importa'l color de la so fía, anque se sienten enforma atristayaos cuando comprienden que naide aprecia la singular guapura de la so fía. Por esti motivu, deciden llamar a un médicu para que-yos desplique que ye lo que ta pasando, pero a lo postrero va ser la pintora Urracapicasa la que dea cola solución. Un cuentu que sirve pa reflexonar sobre lo inxusto que son los prexuicios y la discriminación. Ye un cantu a la tolerancia: lo importante nun ye’l color de la piel o de les plumes, sinón el color de los sentimientos.
Nel actu intervendrán Nicanor García Fernández (Xefe del Serviciu de Formación del Profesoráu, Innovación y Tecnoloxíes Educatives), Pepe Monteserín Corrales (escritor) y Jose Luis Ponce (editor). Tamién participará nel actu’l grupu de teatru infantil Bueño y la neña Mara Rodríguez, amás de Rosana Muñoz y Paula Alonso del grupu de teatru Asturmitomanía, Milio'l del Nido y Javier González.
María Luz Pontón Álvarez naz en Mieres. Acaba los estudios de Maxisteriu na especialidá de Filoloxía Francesa ya Inglesa. Ye Llicenciada en Filosofía y Ciencies de la Educación dende 1998 y esperta n’Informática Educativa, títulu propiu de la UNED, y en Filoloxía Asturiana pola Universidá d’Uviéu. Collaboró con delles revistes d’educación al rodiu del so trabayu d’investigación sobre l'alumnáu d’altes capacidaes. Dirixe y presenta dos programas infantiles en Localia Televisión d’Asturies: La tele de los escolinos y Cuentos y lleendes. Tamién dirixe y presenta na Radio del Principáu d’Asturies el programa Revoltixu nes ondes. Ye autora y directora de les obres que representa’l grupu de teatru «Asturmitomanía». Na actualidá da clases nel Centru d’Educación d’Adultos «El Fontán» (Uviéu). Comprometida dende va tiempu cola recuperación de la llingua asturiana, tien asoleyaos llibros de didáctica, un balagar de cuentos pa los más pequeñinos de la casa y dalgún qu’otru llibru, como ésti, pa neños más grandonos.
María Luz Pontón ye collaboradora na sección de lliteratura infantil d'Asturies.com