Yá ta na cai’l primer discu de llarga duración de La Tarrancha

|

La Tarrancha ta acabantes d'asoleyar Ö-3-3 (Otres tres), que ye’l primeru de llarga duración de la banda. Autoproducíu pol grupu y el sellu Algamar Producciones, el discu foi grabáu en Tutú Estudiu por Sergio Rodriguez nel pasáu mes d’ochobre. Por tar el grupu a la contra de la política de la SGAE, el discu tien llicencia Creative Commons y dientro poco tará disponible na rede.

Depués d’estos años d’esistencia y de munchos cambios na formación, La Tarrancha muestrá n’esti discu el resultáu final
de lo que va ser el so soníu a partir d’agora, “onde cobren un especial protagonismu l’acurdión diatonioca, el trombón y les flautes, acompañando a les guitarres, baxu, percusiones latines y africanes, bateria y voz”, señalen. El discu cuenta con delles colaboraciones, “pero eses meyor descubriles escuchándolu”.
 
La base del soniu de La Tarrancha ye’l ska y el reggae, pero dando-y pincelaes que van dende’l funk al swing, dende’l ragga al folk o de la pachanga a la música tradicional  Too ello con un carcteristicu soníu llimpiu “alloñáu de distorsiones y dureces acustiques”. Too ésto ye lo qu’ellos autodefinen al so propiu estilu como “Mecigayu Ska”.
 
La temática de les lletres ye variada; diendo dende l’amor, a la reivindicación; de la critica, al cachondeo; de la muerte, a la vida y del mundu, al chigre. Tolos cantares son n’asturianu, menos ún d’elles que ta na fala del la zona Navia-Eo. Anque tienen previstos dellos conciertos pa dientro poco, nun tienen entamanao ningún conciertu esclusivu pa presentar el discu, pero afirmen tar trabayando n’ello.
 
El grupu nun comparte l’actual política de la SGAE, a la que consideren meramente recaudatoria, abúsiba y que “va a la escontra de los pequeños grupos y de la xente que realmente vive la música como daqué mas que mercantil, si non cultural, dándose casos d’entamar pleitos y torgar conciertos autoxestionáos por colectivos, sociedaes de festeyos o pequeñes sales, creando un estáu de miéu nel que cada vez s’entamen menos conciertos pequeños onde los grupos puean desarrollar la so creatividá”.
 
Pa poder escuchar un adelantu, tienen tres temes de Ö-3-3 nel so myspace.

Contador Estadistiques