Manuel Niembro recueye’l Pegollu afitando’l valir económicu y empresarial del usu del asturianu

La Xunta pola Defensa de la Llingua entregó ayeri sábadu en Xixón los sos XXV Premios Andrés Solar. Una gala onde se dio entrega del Pegollu, el premiu positivu, a la Ruta’l quesu y la sidra pol “usu que fai esta iniciativa empresarial de la llingua asturiana, nun exemplu de normalidá y puesta en valor de les nuestres señes d’identidá”. Mientres que’l Madreñazu, el negativu, foi pa la Conseyera de Cultura, Mercedes Álvarez González, por “una política llingüística inexistente”. Manuel Niembro recoyó’l Pegollu falando del idioma como un recursu económicu más “que nos apurre valir añadíu ya identidá estremada nel mercáu”.

La Xunta recordó que se cumplíen 25 años de la organización, de los premios y de la muerte del escritor xixones, “25 años nos que’l movimientu de reivindicación foi quien a responder a los ataques a la dignidá del idioma y a los drechos de los falantes cada vez que yera menester”, señalaron.
 
Manuel Niembro, que ye xunto al so hermanu Javier xerente de la “Ruta’l quesu y la sidra”, recibió’l Pegollu en manes de Lali Solar, hermana del escritor de Deva, “con toles duldes de los méritos pa recibilo. Niembro faló de que l’usu del asturianu tien ésitu, poniendo como exemplu’l cartel promocional de la “Güela Videlmina”, que s’alcuentra nuna residencia de vieyos de Bélxica, na Facultá de Comunicación de Castellón como exemplu publicitariu “y del  que’l mesmu Ministru d’Interior, Alberto Pérez Rubalcaba, nos pidió un par d’exemplares esti branu”.
 
Niembro desplicó como la llingua asturiana ta presente na Ruta en delles estayes del conteníu de la visita, yá que ye “imprescindible saber si un quesu cabrales tien o non carpezu o si un llagareru ye lo mesmu qu’un sidreru, y pa esto nun hai otra qu’usar les pallabres n’asturianu, d’otra miente nun se diz nada”. L’usu del idioma propiu tamién vien nel paisaxe y los topónimos “col nome de les instituciones tradicionales na cadarma xurídica de la comunidá campesina”.

Del mesmu mou, l’asturianu ye usáu pa despidir l’actividá, “desplicando’l valir de la llingua como patrimoniu cultural, ferramienta comunicativa y de creación artística,  amás de rescamplar que l’usu de la llingua nun ta xuridicamente garantizáu”. Pa final, Manuel Miembro desplicó que’l pieslle lo pon la poesía que Llorenzu Novo Mier dedicó-y a la sidra.
 
Por too ello la Xunta concedió-y la versión positiva del premiu, mención que pa Niembro “ye un honor el reconocimientu públicu de la nuestra humilde aportación pola normalización y dignificación de la nuestra llingua”. Del mesmu mou faló de que “ye significativu que’l premiu lleve’l nome d’Andrés Solar col que compartimos la noble condición de ser xente de casería”.
 
Darreú vino’l discursu añal de la Xunta, onde’l voceru de la organización, Carlos Pulgar, recordó que se cumplíen 25 ediciones de los Premios Andrés Soldar, ediciones nes que xubieron a recoyer los Pegoyos “representante de la parte más dinámico y lluchador de la sociedá”. Mientres que los madreñazos foron “una auténtica galería de los horrores pela que desfilaron políticos, nos que munchos d’ellos pudieron recibir el Madreñazu nos diferentes cargos que desempeñaron, porque’l reciclaxe de residuos ye una práutica habitual nel establishment asturianu”.
 
Tamién fixo la Xunta un repás pel 2009 no que cinca a la llingua, rescamplando “la coordinación del movimientu de reivindicación llingüística pa ganar la batalla de los nuevos planes d’estudiu de la Escuela de Maxisteriu”. Sicasí, Pulgar faló de que tovía hai que tar sollertes “hasta’l mesmu día que s’empiecen a poner clases tanto en Filoloxía como en Maxisteriu, yá que tovía falta l’aprobación de l’Axencia Nacional d’Evaluación y Acreditación (ANECA)”.
 
Ente les cuestiones negatives numberó la muerte de la matriarca de les lletres asturianes, Nené Losada, los ataques de dellos centros educativos a la escolarización d’asturianu o como esti branu PP y PSOE punxéronse d’alcuerdu “pa dexar ensin efeutu una proposición de llei que pidía la creación de la Especialidá de Llingua pa los maestros de primaria”. Tamién recordaron que’l Gobiernu asturianu fixo qu’Asturies “perdiera una montonera de millones na negociación de la nueva financiación por nun ser l’asturianu llingua oficial”.
 
No positivu falaron del XXI Conciertu pola Oficialidá, les Xornaes de Mocedá y Llingües Minoritaries o les 10.000 semeyes de la campaña del CAO “una iniciativa con ésitu y novedosa na demostración del apoyu popular a la declaración d’oficialidá de la llingua na próxima reforma del Estatutu”.
 
Pa finar el discursu añal de la Xunta, Carlos Pulgar fizo un llamamientu “a tolos simpatizantes a xuntar fuercies y esfuercios p’abrir espacios a la llingua, pa denunciar los incumplimientos y el racismu llingüísticu que bilta en determinaos sectores de la calse política” p’asina “ser quien a algama xusticia, drechos y futuru”.
 
Los asistentes a la entrega de los Andrés Solar foron agasayaos pola organización con una reproducción del cartelu de la primer manifestación pola oficialidá del asturianu, que convocó la organización en 1988. Los Premios zarráronse con un conciertu de Lucas 15, nel que Nacho Vegas y Xel Pereda, dos de los componentes del grupu, interpretaron delles adaptaciones de temes tradicionales asturianos”.
 
Asturies.com ufre a los sos llectores una galería coles semeyes de la entrega de premios