Les Cortes d’Aragón aprueben la Llei de Llingües colos votos del PSOE y CHA

Les Cortes d’Aragón aprobaron esti xueves la Llei de Llingües, que nun reconoz la oficialidá del aragonés nin del catalán, pero si la promoción, enseñu y el drechu a dirixise a l’alministración nestes llingües. La norma foi aprobada colos votos a favor del PSOE y Chunta Aragonesista, mientres que’l PP, IU y Partido Aragonesista votaron a la contra.

La llei, que va entrar en vigor un mes depués de la publicación, reconoz esplícitamente que la única llingua oficial de la comunidá ye’l castellán y establez una zonificación llingüística d’Aragón. Xunto col castellán hai tres zones; de fala aragonesa, de fala catalana y una zona onde se falen les dos llingües propies. Mientres qu’hai otra d’usu esclusivu del castellán.
 
No que cinca a la educación, l’enseñu curricular de les llingües propies será voluntariu y se fairá efeutivu enantes del cursu 2011/2012. Mientres que la Universidá creará los títulos d’especialista en filoloxía catalana y aragonesa. Esplicita que los profesores de llingües propies tarán sometíos al mesmu réxime xurídicu que’l restu d’enseñantes.
 
La nueva norma va crear un Conseyu Superior de les Llingües d’Aragón encargáu de desendolcar la política llingüística, establecer los conceyos que formen les zones llingüístiques y nomar a los miembros de les futures Academia de la Llingua Aragonesa y Academia Aragonesa del Catalán. Esclaria que van respetase siempre les modalidaes llingüístiques “d’alcuerdu coles normes ortográfiques”.
 
Les Alministraciones van favorecer l’usu de les llingües, inclús dientro del Parlamentu, onde va regulase’l so usu. Mientres que la xusticia tendrá que defender los drechos llingüísticos de tolos aragoneses. Los documentos oficiales podrán redactase nel Boletín Oficial de la Comunidá en cualesquier de les llingües propies “por separtáu”. Mientres que los ciudadanos podrán dirixise a l’Alministración na so llingua llariega, contestando ésta na llingua propia y en castellán.
 
La toponimia será afitada namás que na forma histórica, mientres que los conceyos de zones billingües espublizarán los documentos oficiales obligatoriamente nes dos llingües.
 
CHA dio-y el so sofitu al testu, anque refuga la non oficialidá, midida pola qu’IU nun apostó pol testu. PP y PAR nun tán d’alcuerdu cola nueva llei por considerar el catalán llingua propia de la comunidá.