El Bloque anuncia un nuevu espediente sancionador contra Hunosa polos vertíos del Pozu Carrio

La Confederación Hidrográfica del Cantábricu (CHC) abrió un espediente sancionador a Hunosa pol vertíu d’agües residuales procedente del Pozu Carrio. Pal Bloque por Asturies (BA) l’anició d’esti espediente ye la prueba de la falta de respetu de la empresa pol mediu ambiente y les agües del Nalón, polo que “esperen y demanden que la CHA adopte una sanción exemplarizante”.

Los vertíos, producíos demientres tola segunda quincena de xunetu d’esti añu, incumplíen les condiciones establecíes na autorización dada pola Confederación Hidrográfica en 1996 y foron denunciaos pol Bloque. La propia Asociación de Pescadores del ríu Nalón consideró estos vertíos causante de la muerte d’unes 20.000 críes de trucha colos que se repobló’l ríu.
 
L’espediente, según denuncia’l Bloque, vien a sumase al que s’instruyó fai un añu por mor de les obres qu’ensin permisu de la Confederación Hidrográfica taben faciendo en Samuño.