La Coordinadora Ecoloxista presenta los candidatos a la Buyada Purpurina

La Coordinadora Ecoloxista d’Asturies convoca un añu más la Buyada Purpurina, premiu que reconoz el llabor d’aquellos que se destacaron nes sos aiciones contra la natura y el mediu ambiente del país. Esti añu, los nominaos son el secretariu de la FSA, Javier Fernández; Victorino Alonso, “cacique de la minería privada”; el propiu Principáu; el Conseyeru de Mediu Ambiente ya Infraestutures, Francisco González Buendía; la Conseyera de Cultura, Mercedes Álvarez; el Direutor Xeneral de Mines: l’alcaldesa de Xixón, Paz Fernández Felgueroso; la Demarcación de Costes; l’alcalde de Cuideiru, Francisco González Méndez y la papelera Ence-Ceasa.

El secretariu de la FSA, Javier Fernández, senador, diputáu rexonal y “futuru relevu d’Areces", ta nomináu por "quemar cualesquier propuesta de meyora ambiental y democrática n’Asturies”. Mientres que Victorino Alonso ye pa los ecoloxistes “un cacique que zarra mines soterraes y abre a cielu abiertu, ensin importa-y el so impactu, pa ello nun dulda n’amenazar con despidir a los trabayadores pa que-y dean llicencia”.
 
El Direutor Xeneral de Mines recibe’l “honor” por “nun saber cuantes canteres hai n’Asturies”, al facer tal afirmación, y la Demarcación de Costes pola so “obsesión por formigonar la costa asturiana”. Mientres que la papelera Ence-Easa por treslladar a Navia una papelera que nun quieren en Galicia y aumentar en más de 80.000 hectárees los ocalitos n’Asturies.
 
Tol gobiernu asturianu ta nomináu pola so estratexa enerxética convirtiendo’l país “na fabrica d’enerxía d’España”. Mientres que’l Conseyeru de Mediu Ambiente ya Infraestructures, Buendia, ta nomináu por “ceder énte les presiones de los pescadores, pola so defensa de la incineradora y polos sos insultos a los ecoloxistes”. Per otru llau, la Conseyera de Cultura ta nominada por facilitar la destrucción de los xacimientos arqueolóxicos de Carondio.
 
Mientres, l’alcaldesa de Xixón, según los ecoloxistes, fai tolo posible por fomentar el gran Muselón en contra del interés xeneral y coles illegalidaes consentíes. Y por otru llau l’alcalde de Cuideiru vende la costa a los intereses de los empresarios urbanísticos.
 
L’añu pasáu algamó’l premiu la Conseyería d’Industria de Gracia Torre pol so Plan de Gas, “por trayenos la peligrosa regasificadora, les centrales de ciclu combináu y les llinies d’evacuación. El xuráu va decidir el próximu 28 d’avientu cuál de tolos candidatos ye’l ganador.