Tres 32 díes en fuelga de fame, Aminetu vuelve al Saḥara

“Ye un trunfu pal drechu internacional, pa los drechos humanos, pa la xusticia internacional y pala causa saḥaraui”, estes foron les pallabres de l’activista saḥaraui Aminetu Haidar enantes de garrar l’avión medicalizáu que la devolvería a la so casa en L’Ayún, la capital del Saḥara Occidental.  Haidar vuelve y ensin pasaporte español nin marroquín, sinón con un salvoconductu del Gobiernu español qu’acepten en Rabat. Un alcuerdu ente’l Gobiernu español y el marroquín, que cuntó cola participación activa de Francia, punxo fin a 32 díes de fuelga de fame.

Tres pisar el continente africanu y pasar el control marroquín, queda por saber si’l gobiernu de Rabat tomara represalies contra Haidar a llargo plazu tres qu'ésta nun tuviera que pidir perdón al Rei de Marruecos nin reconocer publicamente la so nacionalidá marroquina.

La so vida
 
Haidar ye madre de dos fíos. Fixo estudios de lliteratura moderna y, anguaño, ye la más importante activista pol autodetermín del Saḥara Occidental, tres qu’esta excolonia española fora abandonada pol Estáu nos Alcuerdos de Madrid de 1976, nos qu’España cedía l’alministración temporal del Saḥara Occidental (pero non la soberanía) a una comisión compuesta por Marruecos, Mauritania y España. Asina, l’Estáu cayía ente les presiones de Marruecos y Mauritania, yá que taba comprometida cola ONU pa llevar a cabu la descolonización del territoriu. Anguaño, el Saḥara Occidental ta gobernáu de fechu por Marruecos, polo qu’Haidar tien la nacionalidá marroquina.
 
Por mor de la so ideoloxía pol autodetermín del Saḥara, foi persiguida y reprimida polos poderes públicos marroquinos en numberoses ocasiones. En 1987, con 21 años, formó parte d’una manifestación pacífica na que 700 persones esixían la independencia del Saḥara. Tres la manifestación foi detenida ensin cargos nin xuiciu nuna “prisión secreta” demientres cuatro años, onde sufrió tortures.
 
En 2005 foi condenada pola xusticia marroquina a pasar siete meses nel centru penitenciariu conocíu como “Prisión Prieta” de L’Ayún. El procesu del xuiciu foi denunciáu por un observador unviáu por Amnistia Internacional. Por mor d’ello, entamóse una campaña internacional pola so lliberación, sobre la que’l propiu Parlamentu Européu pronuncióse a favor.
 
Tres un mes de prisión foi lliberada en xineru de 2006. La so puesta en llibertá reavivó les manifestaciones nes cais de L’Ayún y les protestes de los estudiantes saḥarauis de la Universidá de Marrakech.  Tres los fechos Amiratu foi nomada embaxadora itinerante de la República Árabe Saḥaraui Democrática.
 
L’activista recibió dellos premios pola so llabor, pola que se-y conoz como la “Gandhi árabe”. En 1998 la Fundación Robert F. Kennedy premió a Aminetu Haidar pola so llabor a favor de los Drechos Humanos, galardón que-y foi entregáu nel Senáu de los EEXX. Del mesmu mou, foi candidata al Premiu Sájarov a propuesta del Parlamentu Européu, el Premiu Fondo Ginetta Sagan a propuesta d’Amnistía Internacional o la nominación al Premiu Nobel de la Paz nel añu 2008.
 
El Casu Aminetu
 
Los fechos entamaron el 14 de payares, cuando Aminetu y dos periodistes españoles son deteníos nel aeropuertu de L’Ayún, cuando regresaben d’un vuelu procedente de Las Palmas, tres recoyer en Nueva York el “Premiu al Coraxe Civil 2009”. L’activista negóse a poner la nacionalidá marroquina na ficha del control policial, polo que-y quiten el pasaporte y devuélvenla a Lanzarote.
 
Aminatu entama’l 16 de payares una fuelga de fame y presenta una denuncia na comisaría del aeropuertu pola “espulsión illegal” de Marruecos y el “secuestru” y “malos tratos” d’España. Entamen les amueses d’apoyu a l’activista y el Gobiernu español entama a tratar el “Casu Aminetu”, ofreciendo-y l’estatutu de refuxada y la nacionalidá española. El Gobiernu central llega a pidi-y a la ONU la so intervención, anque refuga la del Rei Xuan Carlos I.
 
El 5 d’avientu Marruecos impide que l’activista vuelva a la so casa y anecia en ceder ente la so fuelga de fame. Mientres, el Frente Polisariu amenaza cola llucha armada. El 17 d’avientu, Aminatu ingresa voluntariamente nel hospital tres 32 díes ensin comer. La Eurocámara suspende una votación sobre’l casu pa nun perxudicar les xestiones qu’anuncien la resolución del casu. El Gobiernu español prepara un avión medicalizáu y Aminatu vuelve a la so casa.