El director d'Egunkaria defende que ye la Guardia Civil la que "se xuega'l so prestixu"

|

L'ex director del diariu vascu clausuráu por orde xudicial 'Egunkaria', Martxelo Otamendi, defendió esti xueves que'l procesu que ta siguiéndose contra él y otros cuatro directivos del periódicu na Audiencia Nacional ye "un empeñu de la Guardia Civil" que "construyó una tesis" contra'l periódicu "enganchándose a esa percha de que too ye ETA". "Ye la Guardia Civil la que se xuega'l so prestixu", defendió.

Nuna rueda prensa convocada pola Platafomra d'apoyu a Egunkaria en Madrid, Otamendi punxo de relieve que'l xuiciu celébrase sin acusación de la Fiscalía y sólo cola de les acusaciones populares, representaes pola Asociación de Víctimas del Terrorismo (AVT) y Dignidad y Justicia (DyJ), que-yos atribúin un delitu d'integración n'organización terrorista.

"Y toos sabemos qu'en temes vascos l'AVT y Dignidad y Justicia son los brazos xudiciales del PP y de la Guardia Civil", denunció, tres recalcar que nin siquier hai acusación particular. "Naide mos acusa de perxudicalo en nada", insistió.
  
El periodista vascu, nesti momentu director del Berria, el nuevu periódicu n'eusquera nacíu tras el zarru d'Egunkaria, defendió que la causa contra esti mediu foi un "empeñu" d'un capitán de la Guardia civil "que yá nun ta nel cuerpu", y que-y ofreció en primer llugar el casu nel 2002 al xuez de l'Audiencia Nacional Baltasar Garzon, que tres zarrar n'otra ocasión un periódicu y una radio, nun autorizó continuar cola investigación.
  
Sicasí, el casu acabó en manes del que fuere tamién maxistráu de l'Audiencia Nacional, Juan del Olmo, que dio lluz verde pa continuar les investigaciones contra'l diariu, qu'acabó clausuráu nel 2003.
 
"SUSTU" A LA OPINÓN PÚBLICA VASCA
  
Pa Otamendi, el zarru del so diariu foi en realidá "un sustu xeneral" que'l daquella Gobiernu del PP  y la Guardia Civil quixeron dar a la población vasca pa mostrar que taben "dispuestos a facer cualquier cosa" pa frenar el plan soberanista del Executivu de Juan José Ibarretxe y l'alderique sobre l'autodetermín.
  
Sicasí, aseguró, "salió-yos mal la xugada", dao que la ciudadanía "volcóse" n'apoyalos, tres el "shock" causáu y "sobre too cuadno se denunciaron les tortures" que, según los acusaos, produxéron-yos los axentes de la Guardia Civil.
  
Na rueda prensa tamién participó la catedrática de Derechu Internacional de la Universidá Carlos III, Carlos Lamarca, que sorrayó qu'esti xuiciu ye "un ataque directu a la llibertá d'espresión y cultural", dao que la "única cuestión" que diferenciaba a Egunkaria ye que yera un diariu n'eusquera.

Contador Estadistiques