Francisco Javier García Valledor entregó güei la so acta como diputáu pol grupu parlamentariu IU-BA-Verdes por "coherencia personal" al nun tar d'acordies cola direición de la organización. Destacó qu'un cargu públicu débese a les decisiones de los órganos de direición de la so fuerza política y debe executar y treslladar diches decisiones porque esto forma parte del más elemental de los funcionamientos democráticos de los partíos.

"El problema personal surde como conflictu interior cuando como cargu públicu nun comparte les decisiones de dichu órganu y vese obligáu a defender coses nes que nun cree y coles que nun ta conforme", esplicó Valledor, qu'añadió qu'ante esta situación considera que lo más honrao y digno ye "respetar les decisiones mayoritaries casi unánimies de la direición d'IU y a la vez respetase a sí mesmu presentando la dimisión".

Valledor, en rueda prensa, manifestó que los sos desacuerdos colos órganos de direición son públicos dende hai yá un añu y destacó que daquella yá espresare a los órganos de direición les sos diferencies colos presupuestos del 2009 y sobre otres cuestiones que nun compartíen dando llugar a delles ausencies nos plenos pa nun tener que votar dalgunes de les cuestiones nes que nun taba d'acuerdu.
  
"Nesi momentu punxe la mio renuncia a disposición de los órganos de direición y de magar ehí tratamos d'algamar que nun se dieren diferencies públiques hasta'l puntu de que yo nun participé nes comisiones sobre los presupuestos del 2010, tal y como yera habitual", dixo Valledor.
  
Afirmó amás que se fartucó y tomó la decisión de dexar la so acta de diputáu pola so diferencia col acuerdu presupuestariu del 2010 y cola posición mayoritaria d'IU sobre la posición a favor de la tramitación de "eso que se llama pero nun ye carrera docente".
  
Sicasí, indicó que más que los fechos puntuales, la decisión tomóla porque "defender coses nes que nun se cree resulta un llabor mui díficil". "Pienso que cuando tas faciendo coses que te molesten ye'l momentu de poner puntu final porque ye lo meyor pa toos", esplicó.
 
FORMAR PARTE DEL GOBIERNU
  
Valledor, ante les entrugues de los periodistes, negó que'l so malestar s'agravare por nun salir elixíu pa formar parte del Gobiernu y aseguró qu'eso foi una "trampa que nel so momentu dalguién llanzó de manera anónima".
  
Nesti sen indicó qu'anque-y lo propunxeren, diba refugalo porque nun compartía los conteníos del acuerdu. Amás, aseguró que nun se sintiere "marxináu" nin-y pidió silenciu, anque podía entrever qu'había coses de les que dicía que nun-y prestaben.
  
Entrugáu pola posibilidá de que fuere "utilizáu como moneda de cambiu pa qu'IU llegare a un acuerdu col PSOE sobre los presupuestos", Valledor manifestó que nun foi asina. Sicasí, indicó que "ta convencíu de que va haber munchos dirixentes de la FSA que brindarán con sidra asturiano, como nun pue ser menos ante'l so fonderu asturianismu".
 
NUN HAI CRISIS N'IU
 
L'hasta agora diputáu d'IU-BA-Verdes indicó que'l so relevu vendrá bien a la propia organización y tamién será bono pa él. Amás, manifestó que la so decisión nun supón nenguna crisis pa IU, que güei  ye una organización "cohesionada y fuerte", y con importantes llabores de gobiernu, y añadió qu'en tou casu lo que-y supón ye "un enorme afeición interior y una crisis personal".
  
Poro, pidió disculpes a los votantes d'IU por nun saber o poder desempeñar apropiadamente les responsabilidaes pa les que lu elixeron, anque confió en qu'entiendan que la "coherencia ye tamién un valor políticu".
  
Esplicó que de magar agora volverá al so trabayu como profesor y tamién a desarrollar un papel mui importante como ye la militancia dende les bases n'IU "que ye la so fuerza política".