El Serviciu de Normalización Llingüística del Conceyu de Siero ta desendolcando una campaña de repartu de tarxetes de Navidá col oxetivu de “fomentar que la xente use la llingua nes felicitaciones que se manden nestes fiestas". Repartiéronse mil tarxetes pa escolinos de los centros de Primaria del conceyu y editáronse tamién 400 exemplares p’adultos.

Les tarxetes, que cuntaron con una subvención de la Conceyería de Cultura con una cuantía de 900 euros, van usales dalgunes conceyalíes y repartiéronse nel Serviciu de Normalización Llingüística y en delles biblioteques del Conceyu (La Pola y Llugones). Son tamién tarxetes postales y la intención ye que se pueda escoyer el testu que más preste a cada persona y qu’ello motive a que lo que s’escriba de manera personalizada tea tamién n’asturianu.
 
Les tarxetes de los escolinos tienen un diseñu asemeyáu y cuatro colores distintos. Son tarxetes postales con testos cenciellos de felicitación n'asturianu per un llau (Feliz Navidá y bon añu, Felices Navidaes, Bon añu qu'entra, Felices fiestes, Bon Nadal, Bayurosu añu nuevu) y pa escribir un testu personalizáu, poner les señes y el sellu per otru. Pa ello cuntóse cola collaboración del profesoráu de llingua asturiana.
 
Los exemplares p'adultos tienen cuatro modelos distintos, en cuatro colores y cuatro testos (Verde: Nel acabu d’un añu y l’empiezu d’otru faise revisión y entámense ilusiones. Prestábame daveres que toles tuyes se cumplieren. Bon Nadal y granible añu que vien; azul: Estes fiestes navidiegues paécenme un bon momentu pa deseate felicidá y que l’añu qu’entra te resulte productible. Feliz añu nuevu; naranxa: Esti ye tiempu p’acordase de la xente que se quier y yo aprovécholu pa mandavos los mios deseos de qu’esti añu qu’entra vos venga enllenu de felicidá. Bon añu y felices fiestes; encarnada: Quiero aprovechar estes feches pa mandavos dende Siero un mensaxe de paz y felicidá pal añu que vien. Felices Navidaes y bon añu qu’entra).