El Parlamentu Européu pidirá esti xueves a Marruecos, nuna resolución común presentada por tolos Grupos políticos de la Eurocámara, permitir "sin retrasu" la torna d'Aminetu Haidar al Sahara Occidental, devolve-y la so documentación y caltener la integridá física de l'actividsta saharaui, en fuelga de fame dende'l pasáu 15 de payares. Amás, apoyará "toles alternatives humanitaries" pa garantizar el respetu a la so dignidá y el so derechu a aconceyase sin torgues colos sos fíos y la so familia.

El testu de compromisu algamáu esti miércoles polos grupos parlamentarios votaráse esti xueves pola tarde, asina como trés enmiendes presentaes pol Partíu Popular Européu (PPE) nes que se critica la xestión que fizo d'esta crisis el Gobiernu de José Luis Rodríguez Zapatero.

Tamién la Izquierda Europea (GUE) someterá al plenu una enmienda solicitando que se conxele l'acuerdu d'Asociación ente la UE y Marruecos mientres nun se resuelva la situación de Haidar. Los socialistes españoles, que consideren "equilibrada" la resolución de comrpomisu negociada polos grupos, confía en que nun prospere nenguna de les enmiendes.
  
"Esperamos que nun s'aprueben nin les falses acusaciones al Gobiernu español nin el pidimientu de conxelar l'Acuerdu d'Asociación, porque preferimos caltener el diálogu con Marruecos", esplicó a Europa Press la eurodiputada socialista María Muñiz. "Tenemos que centrar l'atención del Parlamentu nel casu d'Aminetu Haidar y nun tratar de facer política nacional", calcó.
  
La resolución espresa la "seria preocupación" de la Eurocámara pol deterioru de la salú de Haidar y manifiesta el so "fonderu respetu al derechu de l'activista a defender la so causa". De la mesma manera, pide a les autoridaes españoles, "territoriu al que se la treslladó a la escontra de la so voluntá, que continúen prestándo-y l'asistencia y les midíes necesaries pa proporciona-y tou tipu d'ayuda y collaboración pa la recuperación de los sos llexímitos derechos".
  
Los eurodiputaos reclamarán l'apoyu de la Unión Europea pa resolver la situación de Haidar y pidirán tanto a la Comisón Europea y a l'Alta Representante pa la Política Esterior y la Seguridá Común, Catherine Ashton, como a la ONU, "redoblar los sos esfuerzos", ante Marruecos pa qu'autorice la torna de Haidar al so país cumpliendo les sos obligaciones internacionales y teniendo en cuenta que Rabat goza d'un estatus de sociu privilexáu de la UE.