La Tertulia Pachín de Melás cumple un añu falando de los retos de les persones con discapacidá

Esti xueves 17 d’avientu, a les 20.30 hores, la Tertulia Pachín de Melás empobina un alderique sobre la problemática y los retos a los que s’enfrenten les persones con discapacidá. Baxo’l títulu de “"Carreres d'obstáculos. Discapacidá ya Igualdá", la tertulia celebra’l so primer aniversariu pretendiendo ser un “marcu d’alderique abiertu y participativu onde toos puean espeyar les sos opinioes”.

Na charra sobre la discapacidá van participar Ignacio Baizaan, representante de l’Asociación d’Antiguos Alumnos del Sanatoriu Marítimu, Enrique Fernández Garrido, integrante del grupu “Iniciativas” , la Confederación Coordinadora Estatal de Minusválidos Físicos d’España (COCEMFE) y el centru Ángel de la Guarda, Juan José Maté de l’Asociación Nora d’ayuda a persones con parálisis cerebral y Felipe Orviz, de la Fundación ALPE Acondroplasia. La Tertulia tendrá llugar na Cervecería Astuera de Xixón, local situado na cai Joaquín Fernández Acebal, tres el Centru San Agustín.
 
La Tertulia cultural Pachín de Melás naz nel añu 2008 col envís de tratar los temes sociales y culturales qu'afecten a Asturies y nun alcuentren foros afayadizos de discusión pelos calces tradicionales. Nesti añu de vida tien tratao temes como "Regasificadora en Xixón: necesidá y peligros", "El nacionalismu asturianu na transición" o "¿Qué facer cola prostitución?:encruciyaes y propuestes".