Un directivu niega qu'ETA interviniere nel diariu Egunkaria

Ún de los directivos del diariu vascu Egunkaria qu'esti martes entamaron a prestar declaración ante l'Audiencia Nacional, acusaos d'integración n'ETA, Iñaki Uria, negó "dafechu" que la banda interviniere na creación del rotativu nin na desginación de los sos cargos o la toma de decisiones y aseguró desconocer la procedencia de los documentos supuestatemente atopaos a miembros d'ETA que, según la versión de l'acusación particular, los rellacionaben y que, argumentó, publicáronse en prensa "pa facer dañu" al so periódicu.

El xuiciu contra los cinco miembros de la direición del diariu n'eusquera celébrase sin l'acusación de la Fiscalía, que solicitó l'archivu de la causa, y sólo por pidimientu de les acusaciones populares, exercíes por Dignidad y Justicia, que soliciten ente 12 y 14 años de cárcel pa caún de los acusaos, y l'Asociación de Víctimes del Terrorismu, que pide 15 años. Los cinco llegaron esta mañana a l'Audiencia Nacional, acompañaos por una trentena de representantes políticos y simpatizantes del PNV, ERC y otres organizaciones polítiques y sindicales del País Vascu.

El primeru en declarar ante'l Tribunal que preside Javier Gómez Bermúdez foi Iñaki Uría, qu'entamó como sodirector y dempués ocupó los cargos de director y conseyeru delegáu. En castellán, y a entrugues del so abogáu --nun respondió a les acusaciones populares--, esplicó que nel entornu euskaldún espérase con "munchu interés" el nacimientu d'esti rotativu, qu'ente los sos principios básicos contaba cola defensa del eusquera y con ser un periódicu "ampliu, aconceyador, non institucional, militante, profesional y independiente".
  
Uría insistió en qu'Egunkaria dende'l so entamu averóse a "tolos partíos políticos y instituciones pa poder salir alantre", y aseguró que, al ser un periódicu "pequeñu y débil" nun contaba con una "posición editorial fuerte". "Primamos a ser grises antes que brillantes y andar enfadándomos con tol espectru políticu", esplicó. A entrugues de Gómez Bermúdez, relató que recibieron sovenciones de los Gobiernos vascu y navarru y de la Diputación de Guipúzcoa.
  
L'ex director del periódicu relató que nún de los númberos del periódicu incluyóse propaganda d'Herri Batasuna --un "prospectu sobre l'alternativa democrática"-- de la mesma manera que se facíen encartes d'Eroski y la Kutxa, por interés económicu, y recordó que nesos momentos la formación yera llegal.
  
Amás, entrugáu pola publicación de comunicaos d'ETA, esplicó que se fizo "por interés informativu" y recordó que les reivindicaciones d'esta banda entamaron a llegar a "dellos medios" de comunicación del País Vascu y d'ellos facíase cuenta en munchos otros.
 
LOS "DICHOSOS PAPELES D'ETA"
  
Sobre los documentos que s'atoparon a miembros de KAS y ETA qu'aludíen al periódicu y a la designación de los sos directivos, Uría aseguró nun saber "nada" y reconció que causaron un "gran revuelu". "Veníen a la escontra d'Egunkaria, de la nuesa independencia y tentaba de lligamos con ETA, cosa que nun yera", afirmó, pa dempués apuntar que los dichosos papeles" buscaben "facer dañu "al periódicu".
  
Uría recordó que dempués de que se publicaren estos documentos --la principal prueba de les acusaciones, que caltienen que'l periódicu pretendía "dar cobertoria" al ideariu y los intereses terroristes"-- el Cosneyu d'Alministración del rotativu emitió una nota pa denunciar que yeren un "infundiu" y pa dexar claro que "naide dende l'esterior interviniere nunca" nes decisiones d'Egunkaria.