Andecha Astur entama unes xornaes de formación baxo’l títulu de “La izquierda asturiana del sieglu XXI”

Andecha Astur y la organización de mocedá Darréu entamen el próximu fin de selmana les sos IX Xornaes de Formación, que se van desendolcar en Pientueles (Piloña). Col títulu de “La izquierda asturiana del sieglu XXI” recoyerán a lo llargo del fin de selmana delles ponencies, alderiques y talleres “col finxu d’afondar na formación”.

La organización esclaria que “nuna Asturies y nun mundu en permanente cambiu nun queremos dexar d’asumir el retu de siguir siendo preséu de tresformación social atendiendo a les nueves realidaes que se nos presenten n’Asturies y poniendo al tiempu les bases de lo que será la nueva izquierda asturiana del sieglu XXI”
 
Andecha y Darréu cuenten dir completando estes xornaes nun futuru con otros alderiques y actividaes formatives al rodiu la idea de construyir un movimientu d’izquierda asturiana “acordies a les necesidaes d’anguaño”.