Ĉu vi parolas Esperanton? (*)

Esti martes 15 d’avientu fixéronse 150 años del ñacimientu en Polonia de Lázaro Zamenhof, un xudíu que lluchó pol entendimientu y averamientu ente los pueblos del mundu al traviés de la comunicación. Pa ello, Zamenhof creo una llingua nueva: l’esperantu. Los ideales de fraternidá de Zamenhof y la simplicidá gramatical del esperantu fixeron que’l movimientu esperantista nun dexara de medrar hasta los nuesos díes.

Zamenhof vio, gracies a la diversidá cultural de la so ciudá d’orixe, Bialystok, que les diferencies ente los pueblos a causa de la diversidá de llingües y relixones yera causante de conflictos. Asina qu’entamó a trabayar nun idioma fácil d’aprender p’afalar la comunicación ente pueblos y que sirviera como idioma auxiliar internacional, ensin desaniciar los idiomes naturales.

Nuna década, Zamenhof iguó un vocabulariu formáu por raíces de llingües modernes d’orixe indoeuropéu, amás del llatín y el griegu clásicu, una gramática de 16 regles ensin esceiciones y un alfabetu fonéticu.
 
L’entamu del movimientu esperantista foi en 1887, cuando Zamenhof espubliza “La Lingvo internatia” (La llingua internacional), que más tarde foi nomáu “Unua Libro” (Primer llibru). L’autor espublizó esti llibru col nomatu de Doktoro Esperanto (Doctor Esperanzáu), nome col que más tarde sería conocida la llingua
 
Foi esparciendo les sos idees con dineru del so petu, colo qu’acabó na ruina, hasta qu’en 1905 celébrase en Francia’l primer Congresu Universal d’Esperantu, onde s’afita’l movimientu y aprueben el “Fundamentu del Esperantu”, que recueye les bases intocables del idioma.
 
L’esperantu como casi toles llingües nun arreyaes a grandes estaos, foi persiguida. Asina, Adolf Hitler nel so llibru “Mein Kampf” (La mio llucha) fala del esperantu como una llingua que podría ser usada polos xudíos pa dominar el mundu, colo que los esperantistes foron persiguíos n’Alemaña nazi.
 
Y nel polu opuestu de los totalitarismos, Stalin faló del esperantu como una llingua d’espíes, produciéndose la execución d’esperantistes na Unión Soviética. Mientres que na caza de bruxes estaunidense, el senador Joseph McCarthy consideró’l conocimientu del esperantu como una amuesa de simpatía col comunismu.
 
Quiciabes tien dalgo que ver con estes persecuciones, con qu’hasta la década de los 30 del sieglu pasáu, l’esperantismu garrara puxu ente’l movimientu obreru. Asina, los anarquistes, marcaos pola idea de comprensión y collaboración ente pueblos y l’ausencia d’Estaos, apostaron pol esperantu como llingua internacionalista pa la comprensión de la humanidá, lloñe de cualesquier imperialismu.
 
L’Asociación Universal del Esperantu, fundada en 1908, tien miembros en 119 Estaos, trabayando amás de pa esparder el so idioma, pa llamar l’atención sobre’l problema llingüísticu mundial y la necesidá d’igualdá ente llingües. N’actualidá unos cientos de miles de persones tienen l’esperantu como llingua materna, o como una d’elles. Xeneralmente son xente con proxenitores esperantistes que nun comparten idioma maternu y que se conocieron en dalgún congresu d’esperantu. A pesar de ser una llingua ensin territoriu, a entamos del sieglu XX hubo intentos pa que pequeños estaos de curtia historia, como la República d’Isla de les Roses, una plataforma marina nel Adríaticu, de declarar l'esperantu como idioma oficial del Estáu.
 
Anguaño, l’Ethnologue calcula qu’hai unos dos millones de falantes d’esperantu nel mundu. Mui per debaxo de los presaxos de Zamenhof de convertir l’esperantu n’idioma francu mundial. Sicasí, ye una cifra reseñable. Hai una importante lliteratura, calcúlase que s’espublizaron unos 30.000 llibros nesti idioma, esiste música n’esperantu, tamién cine, cuatro llargometraxes dende 1964 y el so usu simbólicu en películes que van dende “El gran dictador”  hasta la tercera parte de Blade. Inclús, topamos na rede, onde esta llingua tien una importante presencia, una páxina web qu’afala l’usu del esperantu n’asturianu.
 
(*) ¿Fales esperantu?