El rector recuerda al Conceyu Universitariu pol Asturianu que creará una comisión de normalización de la 'llingua'

  El rector de la Universidá d'Uviéu, Vicente Gotor, recordó güei que se ta creando na Institución una Comisión pa la Normalización Llingüística de la Universidá, que s'encargará de desarrollar la política llingüística. Foi una parte de la respuesta que'l responsable universitariu dio a la intervención nel claustru celebráu esta mañana de los representantes del Conceyu Universitariu pol Asturianu (CUPA), que pidieron una aceleración de la política llingüística.

"Ta preparándose una Comisión pa la Normalización Llingüística na Univesidá, na que trabaya con interés la Secretaría del mio equipu", comentó Gotor. Amás, recordó que "dende'l Rectoráu, nun tamos a la escontra del asturianu, tolo contrario, tamos demostrando tar a favor". "Ficimos coses y vamos siguir, pasu a pasu, avanzando", señaló, pa recordar tamién qu'actuará "siempre dientro de la llegalidá, porque correspuende al Gobiernu d'Asturies y non a nosotros oficializar l'asturianu".

Gotor respondió asina a la intervención del CUPA, formación qu'apoyare la campaña electoral de Gotor y qu'entendió que la Universidá yá nun vive d'espaldes a la llingua asturiana, sinón que ve la so normalización como parte del so trabayu". Sicasí, consideró que "agora ye'l momentu d'acelerar estes polítiques llingüístiques na Universidá, con nueves midíes que sirvan pa normalizar l'asturianu na Institución. Sabemos que se trabaya nesos pasos, pero l'equipu rectoral nun pue dexar esi llabor pa muncho más alantre".
  
Pero pal CUPA, "esta cuestión nun pue quedar namás en manes del equipu rectoral, tien que participar tola comunidá universitaria, faciendo pola normalización del asturianu: Conseyu d'Estudiantes, Facultaes y Escueles, PAS, Defensor Universitariu..."
  
El Conceyu calcó nel so "apoyu en toles iniciatives que supongan avances pa la llingua asturiana dientro de la Universidá asturiana y convidamos a tolos miembros del Claustru a trabayar na mesma dirección, con una collaboración crítica pero lleal, el consensu ye imprescindible nesta cuestión".
  
Amás, dio la so "norabona al equipu rectoral, cola confianza de que van saber cumplir con too aquello a lo que se comprometieron cola comunidá universitaria".