Los ecoloxistes denuncien un esguace illegal en Siero

La Coordinadora Ecoloxista vien de denunciar énte’l Serviciu de Residuos de la Conseyería de Mediu Ambiente y el Conceyu de Siero, la esistencia d’un esguace illegal na antigua cantera de Calabaza en Siero, nel puntu quilométricu 10 al llau de l'AS 246. Del mesmu mou critiquen la pasividá de les Alministraciones énte una actividá illegal con sustancies peligroses.

Según la organización, nel esguace puen encontrase toa clase de residuos peligrosos; automóviles, camiones, neumáticos, electrodomésticos… Los ecoloxistes piden el so pieslle inmediatu, la retirada de residuos y que s’esixa al propietariu la descontaminación del llugar.
 
La Coordinadora amuesa la so estrañeza yá que nin el Principáu nin el Conceyu paralizaron l’actividá. Cuando supón una vulneración de la normativa asturiana sobre los xestores de residuos y del decretu 1383/2002 del Plan Nacional de Vehículos.