Aprobáu'l dictame de la ponencia de la proposición de llei de llingües d'Aragón col apoyu del PSOE y CHA

El dictame de la ponencia de la Proposición de Llei d'Usu, Proteición y Promoción de les llingües propies d'Aragón aprobóse güei na Comisón d'Educación, Cultura y Deporte de les Cortes d'Aragón col apoyu mayoritariu del PSOE y CHA pa que s'apruebe definitivamente na sesión plenaria d'esta selmana.

Na comisión de güei'l PAR votó mayoritariamente a la escontra y astúvose nel restu del articuláu p'apoyar sólo l'artículu 2 (bis) creáu a instancies d'una moción d'esti grupu parlamentariu y que permite a los conceyos decidir la denomación de les modalidaes llingüístiques. El PP votó mayoritariamente a la escontra, igual qu'IU, qu'amás astúvose nel títulu de la llei.

El coordinador de la ponencia de la Proposición de Llei d'Usu, Proteición y Promoción de les Llingües propies d'Aragón, diputáu del PSOE, Carlos Álvarez, dixo que'l dictame de la pronencia tres "seis intenses sesiones" susténtase en tres pegoyos fundamentales: "la voluntariedá, la territorialidá y la non cooficialidá".  
  
Al so paecer, el testu resultante del dictame sobre la proposición de llei inicial ye "moderáu, pero arrequecióse coles enmiendes tresversales nel trabayu de ponencia".
  
Álvarez agredeció'l trabayu de los grupos parlamentarios pol "esfuerzu importante pa llegar al mayor númberu d'acuerdos posibles", y destacó que les 258 enmiendes presentaes sólo 114 llegarán al alderique y votación ante'l Plenu de la Cámara, polo que'l 56% de les enmiendes apoyáronles o confirmáronles los grupos.
  
En declaraciones a los medios de comunicación, Álvarez sintetizó que "la propuesta ta arriquecida pol consensu, pero caltién l'espíritu de la proposición de llei", que se presentó a iniciativa del grupu parlamentariu socialista'l pasáu mes de xunetu. Asina deduxo que "se da cumplimientu al mandatu establecíu nel Estatutu d'Autonomía y xeneraránse, por fin, derechos a los ciudadanos aragoneses que nun tienen por llingua materna'l castellán".
  
Na so opinión, el testu orixinal "nun sufrió grandes variaciones", pero "engordóse y arriquecióse coles enmiendes". Asina, pasa de los 27 artículos iniciales a unos diez más, pero sorrayó que nun "afecten al espíritu de la proposición de llei y los sos trés pegoyos fundamentales".
  
Al so paecer, diéronse pasos "fundamentales" pa potenciar el so usu de les llingües y les modalidaes llingüístiques y pa fomentar la so enseñanza y promoción amás d'espardir tol conteníu de la llei.