Ánxel Nava gana'l 'XIX Premiu Teodoro Cuesta' de poesía n'asturianu pol so poemariu 'Cilurnión'

L'escultor, pintor y escritor Ángel Nava ye'l galardonáu na XIX edición del Premiu Teodoro Cuesta de poesía n'asturianu, que convoca'l Conceyu de Mieres. El xuráu decidió conceder el premiu al so poemariu 'Cilurnión', presentáu baxo l'apoyu de 'Cilurniu'.

Ánxel Nava, más conocíu nes sos facestes de pintor y escultor, algamó con esti poemariu l'apoyu unánime del Xuráu, destacando'l valor de la obra, según esplicaron los organizadores al traviés d'una nota prensa.

El Xuráu de la XIX edición aconceyó esta mañana na Casa de la Cultura Teodoro Cuesta de Mieres, integráu polos escritores Esther Prieto (de la Editorial Trabe, responsable de la publicación), Xuan Bello (periodista de Les Noticies), Vicente García Oliva, (de l'Academia de la Llingua Asturiana), Ánxelu Gutiérrez Morán (ganador de la pasada edición) y Luis Casteleiro (per parte de la Direición Xeneral de Política Llingüística d'Asturies). Interviniendo como secrtaria del Xuráu María Eugenia González, responsable del Serviciu de Normalización Llingúística del Conceyu de Mieres, y como presidente del Xuráu, Diana González, conceyala de Cultura del Conceyu de Mieres.
  
El premiu Teodoro Cuesta de Poesía, ún de los más prestixosos de los que se celebren n'Asturies, ganáronlu n'anteriores ocasiones poetes como Xuan Bello, Berta Piñán, Esther Prieto, Antón García, Pablo Antón Marín Estrada, Anxelu Gutiérrez Morán, Vanesa Gutiérrez. El próximu añu cumplirá los sos primeros vente años. La cuantía del Premiu ye de 4000 euros y conlleva la so publicación al traviés de la Editorial Trabe.