Oceana pide protexer 45.000 kilómetros marinos nel área Galaico-Cantábrica

La organización internacional de conservación marina Oceana considera necesario protexer 45.000 quilómetros cuadraos marinos nel área Galiaco-Cantábrica y promover la creación de, polo menos, 15 nuevos espacios protexíos, pues nesti momentu sólo se protexen 2.500 kilómetros cuadraos (seis árees marines: tres en Galicia, una n'Asturies, y dos n'Euskadi), según revela un informe d'Oceana, confinanciáu por Fundación Biodiversidá.

Asina, les isles Sisargas, los baxos de Bermeo y Niebla, el cañón d'Avilés, les agües frente a Cabu Peñes, la zona costera de Sonabia, el baxu de Castro Verde, el cañón de Capbretón o los fondos marinos frente a Jaizkibel, son dalgunos de los llugares qu'Oceana identificó como árees d'importancia ecolóxica pa la zona galaico-cantábrica y pa los que pide proteición.

Demientres el 2008, la organización de defensa de la mar analizó los fondos marinos ente Galicia y País Vascu demientres trés meses y identificó cerca de 800 especies distintes y más d'una ventena d'hábitats diferentes: corales d'agües fríes, campos d'esponxes de fondura, xardinos de gorgonies, praderes somarines, arrecifes d'ostres y merucos, llechos de Maérl, fondos llamorgosos con plumes de mar, cañones somarinos, cueves y estraplomos y viesques de quelpos, son dalgunes de les comunidaes atopaes.
  
Asina, nel estudiu destácase'l descubrimientu d'una nueva especie d'esponxa 'champiñón' en fondos rocosos d'ente 50 y 210 metros, l'apaición de tiburones con una mayor distribución xeográfica a fondures superiores a los 300 metros, o la diversidá de corales negros perbaxo de los 150 metros.
 
ESCASEZ DE PEXES DE VALOR COMERCIAL
  
A pesar d'esta gran diversidá biolóxica, Oceana resalta la escasez de pexes y crustáceos de valor comercial, como'l bocarte, el pixín, el gallu, el llinguáu, la cigala o la merluza. "Les muestres algamaes confirmen los preocupantes datos sobre les pesqueríes d'esta zona qu'añu tres añus vien presentando'l Conseyu Internacional pa la Esploración de la Mar (ICES) que cifra que'l 60 por cientu de les pesqueríes tán al borde del colpasu", señala'l documentu.
  
Pela so parte, el director d'investigación d'Oceana Europa, Ricardo Aguilar, llamentó "el mal estáu de los recursos pesqueros y la gran cantidá de basories atopaes", poro exixe la creación "darréu" de nueves árees marines protexíes nel Cantábricu y agües atlántiques gallegues.
  
Nesti sen, esplica que l'área galaica-cantábrica cuenta nesti momentu con menos d'un ún por cientu de la so superficie protexida, cuando'l Conveniu de Biodiversidá exixe la conservación de, polo menos, un diez por cientu de la superficie marina antes del 2012.
  
Esti trabayu encuádrase nes aiciones de llocalización y valoración preeliminar d'árees d'interés del proyectu LIFE + INDEMARES, que tien como oxetivu contribuyir a la proteición y usu sostenible de la biodiversidá nos mares españoles mediante la identificación d'espacios de valor pa la Rede natural 2000: Zones d'Especial Proteición pa les Aves (ZEPA) y Llugares d'Interés Comunitariu (LIC).