La vicepresidenta primera del Gobiernu, María Teresa Fernández de la Vega, quio dexar claro esti vienres que les consultes independentistes que se celebrarán el próximu fin de selmana en Cataluña carecen de validez y "nun tienen consecuencia xurídica dalguna". Amás, refugó que la sentencia que tien qu'emitir el TC sobre l'Estatutu tea alentando l'independentismu.

De la Vega precisó, en rellación coles 150 consultes que se desarrollarán el domingu en delles llocalidaes de Cataluña que "la Constitución y les lleis fixen con claridá les normes que regulan les consultes populares".

Pero esclaró que "estes consultes nun s'axusten nin a la llei nin a la Constitución y poro nun tienen nin validez nin consecuencia xurídica dalguna".
  
Al entrugala si va intervenir l'abogáu del Estáu pa tratar de torgar que se celebren, De la Vega afirmó que'l serviciu xurídicu del Estáu "mírales toes y en cada casu toma una decisión". Sicasí, dixo nun tener conocencia de que decidiere realizar nenguna intervención.
 
REFUGA QUE LA SENTENCIA DEL ESTATUT PROVOQUE INDEPENDENTISMU
 
Al entrugala sobre si la setencia que tien previsto emitir el Tribunla Constitucional (TC) sobre l'Estatutu pue tar afalando al independentismu en Cataluña, esclamó: "de neguna manera".
  
Nesti sen, argumentó que l'Estatut, que "s'aprobó en Cataluña y n'España", ta aplicándose "con normalidá democrática dende que s'aprobó".
  
Recalcó que l'aprobación de la norma autonómica prodúxose primero nel Parlamentu de Cataluña, nel Parlamentu d'España y en referendu. "Too forma parte de la normalidá democrática d'España y en cuanto a l'aprobación de les normes en Cataluña", añadió.