Xega presenta un mapa n’asturianu de los drechos LGTB nel mundu

|

El colectivu Xente Gai Astur (Xega) ta acabantes d’espublizar un mapa n’asturianu de Drechos Humanos LGTB nel mundu. Nél, vien espeyáu, al traviés de colores, la situación de la homosexualidá nel planeta, dende los qu’incorporaron a la so llexislación el matrimoniu ente persones del mesmu sexu, hasta los que castiguen cola muerte les rellaciones homosexuales.

El mapa ta basáu nel informe “Homofobia d’Estáu” de Daniel Ottosson de la Universidá de Södertön (Suecia), fechu en mayu de 2009 pa la International Lesbian and Gay Association (ILGA). El mapa yá foi distribuyíu per 400 centros públicos d’Asturies cola collaboración de l’Axencia Asturiana de Cooperación al Desarrollu, siendo un material que se pue adaptar a asignatures como xeografía, historia o llingua.
 
El mapa va completase a lo llargo del cursu académicu con una unidá didáctica de venti páxines onde se revisará les llexislaciones vixentes de cada país, amás d’un mapa mudu pa que los escolinos puean pintalo colos colores correspondientes.
  
Anguaño, 80 países nel mundu condenen la homosexualidá, con penes que van dende les económiques hasta la prisión. En siete d’estos países (Arabia Saudina, Irán, Mauritania, Nixeria, Somalia, Sudán y Yemen) el castigu ye la pena de muerte. Mientres que países como Uganda van facer una llexislación más dura pa col colectivu gai.
 
N’Irán anguaño hai nueve mozos condenaos a muerte pol fechu d’amar a daquién del mesmu sexu. Destacando’l casu de Nemat Safavi, porque’l “delitu” foi cometíu siendo menor d’edá. Por mor d’ello, el coleutivu LGTB tien entamada la campaña “Los xueves por Nemat”, consistente en contactar por teléfonu, fax o corréu cola Embaxada d’Irán n’España los xueves ente les 9.30 y les 14.30 pa interesase pola situación del mozu.

 
Pues descargar el mapa de Xega nesti enllaz

Comentarios

Pa que los "piji-progres"  qu'anden perehí vean talmente qué países son los que persiguen y executen ensin piedá a la xente d'esti colectivu.

Gabis

Contador Estadistiques