Miguel Rodríguez Monteavaro gana’l “XIX Premio Xeira de Narracióis Curtias”

|

Los miembros del xuráu del Premio Xeira de Narracióis Curtias en gallego-asturianu alcordaron por mayoría otorga-y’l primer premiu al relatu curtiu “Amazonas” de Miguel Rodríguez Monteavaro. El galardón, creáu pola asociación Xeira pa promocionar l’usu lliterariu del eonaviegu, tien una dotación económica de 600 euros.

El xuráu, qu’aconceyó’l pasáu martes 1 d’avientu n’A Caridá, taba formáu por D. Refael Cascudo Noceda, D. Manuel García Galano, D. José Manuel Martínez Castro, y Dña. M.ª José Fraga Suárez, y actuando como secretariu D. Rubén Rodríguez Gayol. Anque les bases del premiu nun contemplen la posiblidá d’un accésit, el xuráu quixó destacar la calidá del cuentu “Pequena” de Moisés Cima, natural de Mouguias (Cuaña).
 
Miguel R. Monteavaro ye un de los escritores más mozos del panorama asturianu. Ñació en Bual el 28 de xineru de 1990. Tien collaboráu en revistes como Trabadel, Entrambasaguas o Lletres Asturianes. Dientro poco espublizara’l so primer poemariu “Trenta razóis para nun medrar” cola editorial Trabe. Anguaño, estudia Filoloxía Hispánica na Universidá d’Uviéu y compaxina esti llabor cola música, onde, col so grupu Mezá, ye un de los referentes culturales más destaos d’esti arte nel Navia-Eo.
 
Ente los premiaos de les ediciones anteriores, dende la primer convocatoria en 1991, tán los nomes de la mayoría d’autores n’eonaviegu de los últimos años; Manolo Galano, Jacinto Díaz,Alejandro Antúñez, Fredo de Carbexe, Rafael Cascudo, Xaviel Vilareyo, María José Fraga, Aurora García Rivas ou Marisa López Diz.

Comentarios

¿Qué ye l'eonaviego?, que llevante la mano'l que sintió na so casa dicir que falaba eonaviego. ¿Nun tamos inventando términos apartaos de la realidá social de los falantes por cuenta los equilibrios políticos?, entrugo, porque por eso mesmo yo pudiere dicir que falo "nalónseyense", y otros "nansaseyense". ¿Cuando faen encuestes llingüistiques la xente qué diz que fala?, ¿dicen que falen eonaviego?

Gabis

Contador Estadistiques