El Polisariu amenaza cola llucha armada si nun s'alcuentra una solución pal Sahara

El Frente Polisariu amenazó esti xueves con retomar la llucha armada si la comunidá internacional fracasa nel so intentu d'alcontrar una solución al contenciosu del Sahara Occidental, que se prollonga dende hai más de 30 años y que volvió ocupar un primer planu na política española con motivu de la fuelga de fame que caltién dende hai 25 díes nel aeropuertu de Lanzarote l'activista Aminetu Haidar.

El ministru de Cooperación de l'autoprocalmada República Árabe Saharaui Democrática (RASD), Salek Baba, afirmó esti xueves que si la fuelga que desarrolla Haidar "conduz a un desenllace final habrá consecuencies imprevisibles", demientres una rueda prensa celebrada en La Laguna (Tenerife), Salek Baba al tiempu que recordó qu'esta posibilidá nun s'executa dende hai 20 años.

Cuando la prensa pidió-y que concretare a qué se refería, alvirtió que "si fracasen los esfuerzos de la comunidá internacional y el plan de paz nun-y queda al pueblu saharaui más que continuar la so resistencia y la so llucha por tolos medios llexítimos, incluyida la llucha armada, ye una posibilidá real". Baba recordó que'l Polisariu nun s'enfrenta coles armaes a Marruecos dende hai 20 años.
  
Baba mostróse partidariu amás d'algamar "un acuerdu pa una decisión pacífica y s'evita'l retornu a la belixerancia" y añadió que "si fracasa la comunidá internacioal nos sos esfuerzos la vía bélica ye una posiblidá real que ta plantegada".
  
Per otra parte, defendió la intervención del rei p'atopar una salida al casu Haidar. "Sería mui útil p'acelerar la solución", sorrayó y añadió que "Marruecos tien qu'entender que'l chantaxe, la inmigración o'l terrorismu nun puen ser causes que torguen la defensa de los Derechos Humanos".
  
Nesti puntu, reclamó la "solidaridá y movilización" de la sociedá española pa poner fin a la situación polo que pasa Haidar. "Ye imprescindible que vuelva de manera llibre a la so tierrra", afirmó y demandó "más xestiones diplomátiques". "Señaló que tanto'l gobiernu español como'l francés puen defender los Derechos Humanos y añadió qu'espera "dalgún xestu" d'Estaos Uníos.
 
COMPLICIDÁ ENTE MARRUECOS Y ESPAÑA
  
El ministru dixo alvertir "cierta complicidá" ente'l Gobiernu español y l'alauí y afirmó que los esfuerzos realizaos pol Executivu que preside José Luis Rodríguez Zapatero "nun son abondo". "Maruecos nun fizo casu", quexóse y añadió que "hai que tocar toles puertes pa que Haidar vuelva llibre y cola cabeza alta". Amás, añadió que "España tomó parte na creación d'esti problema".
  
Con respeuto a l'actuación de la UE, afirmó que "desentendiéndose nun se-y quita responsabilidá". "Facer la vista gorda nun xustifica la posición de la UE, que debe presionar a Marruecos pa que respete los Derechos Humanos", sentenció'l ministru. Equí almitió que la solución nun pasa pola actuación del Gobiernu de Canaries, pero recalcó que les instituciones del archipiélagu mostraron la so empatía a Haidar.
  
Amás, el ministru de Cooperación alertó de que s'incrementó la represión y la violencia contra los Derechos Humanos de Marruecos contra la población "indefensa" saharaui, "por reivindicar pacíficamente más llibertá d'espresión, movilidá y la lleximitidá internacional". Equí mostró'l so refugu al últimu discursu del rei Mohamed VI, del que dixo que "fai más difícil avanzar n'acuerdos".