Obama afirma, na ceremonia del Nobel de la Paz, que l'usu de la fuerza ta "xustificáu n'ocasiones"

|

El presidente d'Estaos Uníos, Barack Obama, afirmó güei n'Oslo, demientres la ceremonia d'entrega de la medalla d'oru acreditativa del Premiu Nobel de la Paz, que "n'ocaciones" l'usu de la fuerza ta "xustificáu".

El galardón, que-y otorgó'l pasáu mes d'ochobre'l Comité Nobel Noruego polos sos "estraordinarios esfuerzos pa reforzar la diplomacia internacional y la cooperación ente los pueblos" y pol so "trabayu por un mundu sin armes nucleares", inclúi una medalla de 18 quilates, un diploma, y un cheque de diez millones de corones sueques (casi 960.000 euros), qu'Obama va donar a llabores caritatives.

Nel so discursu, Obama anunció qu'aceptaba'l premiu y alvirtió que nun quedaría "paráu" ante les amenaces contra Estaos Uníos. "N'ocasiones ta xustificáu l'usu de la fuerza", aseguró, dao que les "negociaciones nun convencerán", a Al Qaeda pa que renuncie a les armes.
  
El galardonáu aseguró que'l mundu nun debe inorar l'amenaza de les armes nucleares n'oriente Próximu y n'Asia y alvirtió que nun se debe permitir que países como Irán o Corea'l Norte "abusen del sistema", y que, poro, debe actuase contra los Estaos que "ruempen les regles".
 

Contador Estadistiques