Los ecoloxistes denuncien los daños al patrimoniu nes obres de la Sierra de Carondio

La Coordinadora Ecoloxista d’Asturies denunció énte’l Seprona, la Conseyería de Cultura y el Conceyu d’Ayande les obres d’accesu a les obres del parque eólicu de Carondio, que según los ecoloxistes tan provocando importantes daños al patrimoniu históricu de la Sierra de Carondio. Poro, soliciten-y al Principáu la paralización de les obres del parque eólicu.

Según denuncien, les obres dañaron la Carreiriega de los Gal.legos, que ye un camín históricu que discurre pol Cordal y comunica les cuenques del Navia y del Narcea y sirvía pa llevar l’oru de les Mines de Bustantigu a Grandas de Salime. Siendo un bien protexíu d’alcuerdu al artículu 61 de bines protexíos pola Llei 1/2001 de Patrimoniu Cultural.

La Conseyería de Cultura afitó que les obres nun se podíen realizar a menos de 25 metros de la Carreiriega. Sicasí, esto ta siendo incumplíu según comprobaron los ecoloxistes y puen vese escavaciones nel mesmu camín históricu. Pa la Coordinadora, esti incumplimientu de la llexislación ye responsabilidá de la empresa de les obres y los funcionarios que permiten esti dañu.
 
En Carondio, ta faciéndose un parque eólicu de 25 molinos de 2 Mw, nun paisaxe d’alto valor natural onde s’alcuentra’l mayor conxuntu tubular del país. Dientro d’esti paisaxe protexíu atópense restos de cultures primitives, como amuesa qu’una vegada entamaes les obres, s’alcontrara un campamentu romanu, esclarien los ecoloxistes.