Los cabezaleros europeos afirmen que tentarán d'ayudar a los países probes contra'l cambiu climáticu

El problema de la financiación ye una de los principales torgues pa llograr un acuerdu en Copenhague que sostituya al protocolu de Kioto. Nin siquier la UE, que presume d'asumir un papel de lideralgu ens negociaciones, llogró hasta agora decidir cuála será la so contribución poles reticencies de países como Alemaña, que nun quieren poner tan pronto una cifra sobre la mesa o de los socios de l'amplación, que reclamen previamente un repartu internu de la factura.

Pero la presidencia sueca pretende que los cabezaleros europeos pacten nel conceyu qu'entama esti xueves polo menos los fondos que la UE aportará ente'l 2010 y el 2013, darréu dempués de Copenhague. La comisión propunxere que la cantidá fuere de 2.100 millones añales, pero nel borrador de conclusiones nun apaez nenguna cifra. Hasta agora, sólo España y Reinu Uníu anunciaron la so contribución demientres esti periodu, que será de 100 millones d'euros y 800 millones de llibres.
  
Al marxe de la cuestión financiera, los Ventisiete aprovecharán el conceyu pa repetir la so ufierta d'aumentar del 20% al 30% el so oxetivu de reducción d'emisiones d'equí al 2020, en comparanza colos niveles de 1990, siempre que "otros países desarrollaos se comprometan a reducciones d'emisiones comparables y que los países en desarrollu contribuyan bastante, según les sos responsabilidaes y capacidaes respectives".
  
Pero tampoco hai acuerdu ente los cabezaleros europeos sobre cuál ye'l momentu pa decidir esta meyora na ufierta. Los países del este reclamen antes que la Comisón faiga un estudiu d'impactu, mientres qu'otros Estaos miembros, como Reinu Uníu, piensen que, si se cumplen los requisitos, la meyora podría decidise nel conceyu de Copenhague, por exemplu, mediante un conceyu estraordinariu de ministros de Mediu Ambiente, o de xefes d'Estáu y de Gobiernu'l 17 d'avientu.
  
En tou casu, los Ventisiete reclamarán qu'en Copenhague s'algame un acuerdu "global, completu y ambiciosu", que torne seis meses más tarde nun "instrumentu xurídicamente vinculante".