Carlos Osoro amuesa la so posición favorable a les mises en valencianu

Según informa güei’l diariu valencianu “Levante”, el nuevu Arzobispu de Valencia, Carlos Osoro, amosó la so posición favoratible a dar misa en valencianu. Lo que supondría que dende la ilesia de la comunidá se diera puxu al llibru llitúrxicu oficial en valencianu pa la so aprobación pola Santa Sede. Un xestu que reclamen la parte progresista de la Ilesia y l’Acadèmia Valenciana de la Llengua.

Osoro dixo que taba “a favor”, anque esclarió que “nun ye una cuestión namás del arzobispu de Valencia”, yá que se tienen que poner d’alcuerdu tolos obispos de la provincia eclesiástica. En 2004, los tres obispos del País Valencianu refugaron la propuesta de misal en valencianu qu’aprobara l’Acadèmia Valenciana de la Llengua (AVL).
 
Les razones yeren que se diba renovar la xerarquía católica en Valencia y que, en 2004, nun había “paz llingüística” (en referencia a la polémica catalán-valencianu) y “alcuerdu definitivu” sobre la normativa valenciana. Sicasí, anguaño yá se reconoz dende l’alministración la unidá del idioma catalán y l’AVAL tien aprobáu dende 2005 una gramática y un diccionariu normativu.
 
El llibru llitúrxicu contemplaría l’orde y mou de celebrar misa en valencianu, dalgo a lo que’l predecesor d’Osoro, Agustín García-Gascón, siempre s’amosó contrariu. Ye de reseñar, que l’actual Arzobispu de Valencia y ex Arzobispu d’Uviéu siempre refugó la celebración d’actos llitúrxicos n’asturianu ya impidió la oficialización de los testos clericales na nuesa llingua, pasu previu pa poder dar misa n’asturianu.