Los inmigrantes de Cataluña podrán votar nel 13-A

Esti domingu 700.000 catalanes de 170 conceyos tán llamaos a espresar nes urnes si tán d’alcuerdu cola independencia o non. Del total, 125.000 persones son inmigrantes ensin nacionalidá española, que verán reconocíos per primer vez el so drechu al votu.

Les normes del referéndum esclarien que tán llamaos a votar les persones empadronaes nuna población, independientemente de tener ciudadanía española o non. Poro, delles asociaciones d’inmigrantes organizaron campañes de sofitu al referéndum y a la propia independencia.
 
La capital tamién decide
 
Güei al mediudía va presentase delantre de la Sagrada Familia, la plataforma Barcelona Decideix, con persones representatives de les fasteres, entidaes y asociaciones de la capital catalana. La consulta de Barcelona podría ser el reblagu final pa la independencia por mor de la so población y el pesu internacional que tendría esta consulta. Ente les feches señalaes pa que los barceloneses amuesen la so posición sobre la independencia, fálase d’abril de 2010.