El mierense José Juan González García gana’l VII Concursu de cómic n’asturianu Comarca de la Sidra

La obra “Nel día de la victoria” del autor mierense José Juan González ye la ganadora del VII Concursu de Cómic n’asturianu Comarca de la Sidra. Nella, nárrase una escura historia ambientada nun Nueva York en ruines. L’autor, que lleva un premiu de 500 euros, ye un dibuxante autodidacta con un estilu mui personal que yá foi reconocíu con dellos premios.

Del mesmu mou, el xuráu concedió dos accésit de 200 euros caún a la futurista “Creación 3.0”, d’Enrique Carballeira y “Fuñería” del xixonés Diego Bernardo Álvarez, una obra d’ambiente mitolóxicu.
 
El concursu forma parte del programa d’espardimientu cultural CREACIÓN qu’empobina’l Serviciu de Xuventú Comarca de la Sidra gracies al patrociniu de Caxastur y la collaboración de la Conseyería de Cultura y Turismu del Principáu.
 
El 18 d’avientu tendrá llugar la entrega de premios y la presentación de la esposición que va recoyer una selección de los trabayos presentaos a concursu. Será a les 18 hores na Sala Loreto de Colunga y contará cola actuación del monologuista Carlos Alba.